Sharaǵa elordadaǵy joǵary jáne orta oqý oryn stýdentterimen qatar, qalanyń quqyq qorǵaý salasy qyzmetkerleri, Qazaqstan halqy Assambleıasy quramyndaǵy etnomádenı birlestik ókilderinen quralǵan 70-ten astam adam qatysyp, keshenniń aınalasyn qoqystan tazartyp, osynda jambasy jerge tıgen Á.Kekilbeav, F.Ońǵarsynova qatarly taǵy basqa qaıratker tulǵalardyń máńgilik mekenin gúlmen kómkerdi.
Bul retki aksııa joǵarydaǵy jastar qanatynyń uıymdastyrýymen ótip otyrǵan úshinshi shara eken. Buǵan deıin olar mamyr aıynda ótken Uly Jeńis merekesi kezinde qaladaǵy tyl jáne soǵys ardagerlerine qamqorlyq kórsetse, odan keıin 31 mamyr – saıası qýǵan-súrgin jáne asharshylyq qurbandaryn eske alý kúnine oraı «Taǵzym» atty tanymdyq taqyryp aıasynda jastardyń basyn qosyp, qýǵyn-súrginge ushyraǵan tulǵalar tarıhyna qatysty birshama jaqsy ister atqarypty.
Aksııaǵa qatysýshylardy quttyqtaı kelgen Qazaqstan halqy Assambleıasy Tóraǵasynyń orynbasary-Hatshylyq meńgerýshisi Leonıd Prokopenko, mundaǵy maqsat – kıeli mura eskertkishterdi saqtaý jáne dáripteý, qoǵamdyq máni bar áleýmettik jobalardy iske asyrýǵa jastardyń qatysýyn qamtamasyz etý, sonymen birge jalpyǵa ortaq mádenı jáne rýhanı qundylyqtar negizinde qazaqstandyq biregeılik pen patrıotızmdi nyǵaıtý bolyp tabylady, dedi.
Atalmysh aksııa budan basqa elimizdiń úsh óńirinde bir mezgilde qatar ótti. Atap aıtqanda, respýbıkalyq deńgeıde qasıetti nysan qataryna engen Almaty qalasyndaǵy Táýelsizdik alańynda, kelesisi Qaraǵandy oblysyndaǵy tarıhı eskertkishter kesheni shoǵyrlanǵan Ulytaý jerinde, úshinshi Mańǵystaý jerindegi Otpantaý tarıhı-mádenı keshende uıymdastyryldy.
Sharaǵa muryndyq bolyp otyrǵan Qazaqstan halqy Assambleıasynyń «Jańǵyrý joly» respýblıkalyq jastar qozǵalysynyń úılestirýshisi Mádı Aqylbektiń paıymynsha, bul aksııanyń bolashaq úshin bereri mol, ásirese jas býynǵa otansúıgishtik ıdeıasyn sińirýge taptyrmas qural. Sondaı-aq sharanyń ekinshi bir maqsaty – elimizdegi rýhanı mańyzǵa ıe tarıhı nysandardy nasıhattaý arqyly barsha qazaqstandyq jastardy bir múddege toǵystyrý degenge toqtaldy.
Beken QAIRATULY,
«Egemen Qazaqstan»
