Bagdasarovtardyń sırkten ajyramaǵan aıshyqty taǵdyry naǵashy atalary Nıkolaı Iаzevten bastaý alady. Odan keıin óz ákeleri Mıhaıl Bagdasarov ta janýarlardy jaqsy kórgeni sonshalyqty, túbinde ań úıretýshi bolyp shyǵady. Sırk sahnasynyń qaltarystarynda ýnıformısterge qolynan kelgenshe janasa júrip, talaı qyzyqty bastan ótkergen Mıhaılge kúnderdiń kúninde armanyna bir taban jaqyndaýdyń sáti túsedi. Margarıta Nazarovanyń Rada degen jolbarysy tordan shyǵyp ketip, jaıbaraqat otyrǵan bir ártistiń grımer bólmesinen bir-aq shyǵady. Qorqynyshtan ólip qala jazdaǵan ártiske kómekke umtylǵan ýnıformısterdiń ishinde júrgen Bagdasarov osy joly erekshe kózge tússe kerek. Júrekjutqan jas balanyń qaısarlyǵyna tánti bolǵan Nazarova keıin ol 18 jasqa tolǵanda attraksıonǵa alýǵa ýáde beredi jáne sol sózdiń údesinen shyǵady.
Odan keıin Bagdasarovtyń ózi de birden jolbarysty jýasyta almaǵan. Reseı Halyq ártisi atanǵanǵa deıin kóp jumys isteıdi. Aldymen «Zabavnye oslıkı» nómirimen daralanyp, esektiń esti haıýan ekenin dáleldeıdi. Mıhaıl tek 1979 jyly ǵana 18 ýssýrı jolbarysyn jetektep, qyzy Karınanyń kómegimen sırk manejinde saltanat qurady. «Jolbarystar shoýyna» eki jyldan keıin uly Artýr qosylady.
Mine, sol Bagdasarovtyń uly men qyzy búginge tórtkúl dúnıege tanymal bolǵan sırktiń bel balasyna aınalyp otyr.
Aldaǵy kúnderi Almatydaǵy Qazaq memlekettik sırkinde Máskeýdegi Nıkýlın sırkimen birge óner kórsetetin apaly-inili daryndar aldymen qaladaǵy balalar úılerine, arnaýly ortalyqtarǵa baryp, kishkentaı kórermenderdiń kóńilin aýlamaq.
Bagdasarovtar balalar úılerine tek jolbarystaryn ǵana jetektep aparmaıdy. Balaqaılarǵa arnalǵan sheberlik dáristerinde jan-janýarlardyń tilin túsinýdi, minez-qulqyn ıgerýdi úıretedi.
Jahanda jyrtqyshtarmen jumys isteıtin er-azamattar az emes. Al 18 jasynda 18 ýssýrı jolbarysymen birge úlken sırktiń manejine shyqqan Karınanyń óner joly shynynda da dara.
Artýr men Karınanyń ákesi qyryq jyl boıy jolbarys, ilbis, arystandy aýyzdyqtaı otyryp, qaıtalanbas trıýkter týdyrǵan áýlet. 12 jasynan bastap ákesimen birge esekti bıletken Artýr da, 16 jasynan jolbarysty yrqyna baǵyndyrǵan Karına da áli kúnge deıin álemdegi eń jas ań úıretýshiler sanatynda. Apaly-inili Bagdasarovtar bir jaǵynan sırktiń jan-janýarlarǵa qatysty janrynda, haıýandardy urmaı-soqpaı, adamgershilikpen jumys isteıtin jup sanalady.
Aınash ESALI,
«Egemen Qazaqstan»
ALMATY
