Bıyl 20 jyldyq mereıtoıy atalyp ótetin elimizdiń bas qalasynda búginde 20 myńǵa jýyq aq halatty abzal jandar eńbek etedi. Osynaý 20 jylda Astana turǵyndarynyń sany 3,7 esege ulǵaıyp, shahar jyl saıyn 40-50 myń adammen tolyǵyp otyr. 20 jyl ishinde elordada 25-ten asa medısınalyq nysan salynyp, 8 mıllıonǵa jýyq ota jasaldy. Medısına qyzmetkerleri kúni qarsańynda uıymdastyrylǵan mańyzdy sharanyń ashylý saltanatynda sóılegen sózinde osyndaı derekterdi alǵa tartqan Astana qalasynyń ákimi Áset Isekeshev densaýlyq saqtaý salasyna árkez aıryqsha kóńil bólinetinin, jyl saıyn 90 mıllıard teńgege jýyq qarjy qarastyrylatynyn, byltyr 4 myńǵa tarta dáriger biliktiligin arttyrǵanyn atap ótti. «Dárigerlerdiń jumysyn jaqsy bilemin. Erekshe qadirleımin. О́ıtkeni, ózim pedıatr-dárigerdiń balasymyn. Astana úlken shahar bolǵandyqtan mundaǵy medısına qyzmetkerleriniń jumysy ońaı emes. Kelimdi-ketimdi jurt kóp. Qala emhanalaryna kún saıyn 8 myńnan astam turǵyn kelse, 400-ge jýyq naýqas aýrýhanaǵa jatqyzylyp, 120-ǵa jýyq aýyr ota jasalady. Jedel járdem qyzmetine táýligine – 1500, jylyna – 500 myń shaqyrtý túsedi eken. Sondyqtan sizderdiń eren eńbekterińizdi eskere otyryp, osy «ALTYN SHIPAGER» syılyǵyn taǵaıyndaýdy jón kórdik. Barlyqtaryńyzdy tól merekelerińizben shyn júrekten quttyqtaımyn!» dep ystyq lebizin bildirdi.
Sondaı-aq qala ákimi Á.Isekeshev astanalyq aq jeleńdi abzal jandardyń ishinde erekshe kózge túsip, halyqtyń iltıpatyna ıe bolǵan 6 dárigerge baspana kiltin saltanatty túrde tabys etti. Al bıyl Astana dárigerlerine tuńǵysh taǵaıyndalǵan «ALTYN SHIPAGER» syılyǵy 12 atalym boıynsha ıelerin tapty. S.Aqsholaqov, M.Alshynbaev, A.Baıgenjın, N.Batpenov, V.Benberın, M.Quljanov, Q.Omarov, Iý.Pıa, N.Petýhova, M.Shaıdarov sekildi elimizge ǵana emes, halyqaralyq deńgeıde tanymal bilikti dárigerler «Medısınaǵa qosqan úlesi úshin», Astana qalalyq №1 emhanasynyń otolarıngologııa ortalyǵynyń jetekshisi Gúlmıra Muhamadıeva «Úzdik dáriger», qoǵamdyq densaýlyq saqtaý salasynyń bilikti mamany Sarhat Beısenov «Úzdik epıdemıolog», Astana medısına ýnıversıtetiniń oqytýshysy Balabı Aıǵojın «Mamandyǵyna adaldyq», №2 qalalyq emhananyń bas dárigeri Ivan Lı «Densaýlyq saqtaý isiniń tıimdi menedjeri», №1 perınataldy ortalyqtyń bólim meńgerýshisi Asyljan Erekeshov «Biregeı ota jasaǵany úshin», Onkologııa ortalyǵynyń bólim meńgerýshisi Darhan Ahmedın «Dıagnostıka men emdeýdiń jańa ádisin engizgeni úshin», «Habar 24» telearnasynyń bas dırektory Olga Gorelık «Aqparattyq seriktes» atalymdarymen marapattaldy. «Habar» telearnasynyń arnaıy syılyǵy qalalyq alǵashqy medıko-sanıtarlyq qyzmet kórsetý qyzmetiniń mamany Altynshash Tabyldınaǵa berildi. №1 qalalyq emhana «Sıfrlandyrý kóshbasshysy», «Salamatty Astana» medısınalyq ortalyǵy «Medısınalyq jeke qyzmet kórsetýshi úzdigi» atalymdaryn ıelenip, ár atalym jeńimpazdaryna 1 mıllıon teńgeniń sertıfıkattary tabys etildi.
Marapat alyp, mereıleri ústem bolǵan dárigerlerdiń barlyǵy da óz isiniń kánigi sheberleri deýge bolady. «Úzdik dáriger» atalymyn ıelengen Gúlmıra Muhamadıeva №1 qalalyq emhanada 25 jyl boıy taban aýdarmaı eńbek etip keledi. Al «Biregeı ota jasaǵany úshin» atalymynyń jeńimpazy, №1 perınataldy ortalyqtyń bólim meńgerýshisi Asyljan Erekeshov úsh aıǵa deıingi, ıaǵnı 550 gramnan joǵary salmaqtaǵy nárestelerge ota jasaıdy. Ol osy ýaqytqa deıin 2 myńǵa jýyq ota jasaǵanyn aıtady. Ákesi, anasy, jubaıy da dáriger, sonymen birge balasy da búginde dárigerlikti oqyp jatyr eken. «Osydan 10 jyl buryn Astanada Ana men bala ǵylymı ortalyǵy ashyldy. Sol jerde Qazaqstan boıynsha birinshi ret náresteler hırýrgııasy bólimshesi jumys isteı bastady. Osy on jyldyń ishinde qanshama náresteniń janyn saqtap qaldyq. Biz týa bitken aqaýlary bar sábılerge jylyna 300-ge jýyq operasııa jasaımyz. 270 gramdyq shaqalaqqa jasaǵan operasııa eshqashan esimnen ketpeıdi. Oǵan bir mezette bir emes, úsh ota jasadyq. Balamyz aman qaldy. Qazir altyǵa keldi. Qudaıǵa shúkir. Bul syılyq tek maǵan emes, meniń qasymdaǵy dárigerlerge, áriptesterime kórsetilgen qurmet, jumystaryna berilgen úlken baǵa dep esepteımin», deıdi bala janashyry.
Alǵash ret qyzyl kilemmen júrip ótken elordalyq dárigerlerdiń elimizdegi medısınanyń damýy men jańarýyna qosqan úlesi zor ekeni belgili. Astananyń 20 jyldyq mereıtoıy aıasynda alǵan marapattary aq jeleńdi abzal jandarǵa aıryqsha kóńil-kúı syılady.
Azamat QASYM,
«Egemen Qazaqstan»
ASTANA
