Bul týraly eki boksshynyń ózi, promoýterleri jáne jekpe-jekti aqyly túrde translıasııa jasaıtyn HBO telearnasy resmı túrde habarlady. Resmı málimdeme jasalǵan soń sheteldik BAQ betterinde jekpe-jekti uıymdastyrýshy taraptardyń pikirleri jarııalana bastady.
Jankúıerler taǵatsyzdana kútken Golovkın-Alvares arasyndaǵy ekinshi kezdesý osy jyldyń 15 qyrkúıekte ótetin bolyp bekitildi. Meksıkalyq tarap bul kúndi beker tańdamaǵan. Sebebi, 16 qyrkúıek meksıkanyń táýelsizdigi kúni. Al bul óz kezeginde aqyly kórsetilimdi (PPV-translıasııa) kóp satýǵa múmkindik beredi. Jekpe-jek alǵashqy kezdesý ótken Nevada shtatynyń Las-Vegas qalasynda ornalasqan T-Mobile sport kesheninde ótedi dep belgilengen.
Aıta keterligi Golovkın men Alvares arasynda ekinshi kezdesý ótkizý týraly kelissóz nebári bir jarym saǵatqa sozylǵan. Bastapqyda meksıkalyq taraptyń promoýteri ESPN basylymyna bergen suhbatynda ekinshi kezdesý ótpeıdi dep málimdegen-di. Biraq bes mınýttan keıin qos tarap kelissóz ótkizý úshin ústel basyna otyrdy. Osyǵan deıin De La Hoııa boks keshinen túsetin qarjynyń 57,5 paıyzy Saýl Alvareske, al qalǵan 42,5 paıyzy Golovkınniń enshisine túsetini týraly usynys jasaǵan. Birinshi aıqasta tabystyń 70 paıyzyn meksıkalyq boksshy, 30 paıyzyn otandasymyz alǵan bolatyn.
Eki boksshynyń arasyndaǵy aıqas alǵash ret ótken jyly 16 qyrkúıekte T-Mobile arenasynda ótip, teń aıaqtalǵan. Buǵan deıin rematch 5 mamyrǵa josparlanǵan edi, alaıda meksıkalyq boksshynyń dopıng synamasy oń nátıje berýine baılanys-
ty jekpe-jek ótpeı qaldy. Artynsha Alvares jarty jylǵa sporttan shettetildi. Jaza tamyz aıynyń 17-si kúni aıaqtalady.
Gennadıı Golovkın 5 mamyr kúni amerıkalyq Vanes Martırosıanmen judyryqtasyp, ekinshi raýndta nokaýtpen jeńdi. Osy kezdesý úshin qazaqstandyq boksshy IBF jelisi boıynsha ótetin mindetti kezdesýin keıinge shegergen edi. Al jaqynda ýkraınalyq Sergeı Derevıanchenkomen mindettelgen aıqasyn ótkizý úshin qaǵaz túrinde kelisim berýden bas tartyp, IBF otandasymyzdy tıtýlynan aıyrǵan-dy. Aldaǵy jekpe-jekte Golovkın qazirgi ýaqytta ózinde bar WBC, WBA (Super) jáne IBO beldikterin ortaǵa salady.
Álı BITО́RE,
«Egemen Qazaqstan»
