Atalǵan másele jýyrda ǵana oblys ákiminiń keńesinde qaıta qaraldy. Oblystyq qarjy basqarmasynyń basshysy Gamlet Qaınarbekovtiń oblys bıýdjetiniń aǵymdaǵy jyldyń birinshi maýsymyna oryndalýy týraly esebine súıensek, atalǵan merzim ishinde oblys bıýdjetiniń kiristeri 97 mıllıard 227,3 mıllıon teńge somasynda 105,5 paıyzǵa qamtamasyz etilgen. Sonymen qatar, menshikti kirister jospary 24 mıllıard 251,3 mıllıon teńgege nemese 123,8 paıyzǵa oryndalyp, bıýdjetke 4 mıllıard 662,7 mıllıon teńge jospardan artyǵymen túsken. Sonymen qatar, basqarma basshysynyń aıtýynsha, oblys boıynsha jospardaǵy 95 mıllıard 892,0 mıllıon teńge somasyndaǵy bıýdjettik qarajattar 94 mıllıard 283,1 mıllıon teńgege nemese 98,3 paıyzǵa ıgerilgen. Alaıda 1 mıllıard 608,9 mıllıon teńge ıgerilmeı qalyp tur.
Qarjy basqarmasynyń basshysy Taraz qalasynyń kórsetkishi oblystyń ortasha kórsetkishinen tómen ekendigin de atap ótti. Onyń aıtýynsha, jalpy Jambyl óńirinde búgingi kúni ıgerilmegen qarajattardyń 837,3 mıllıon teńgesi nemese 52,1 paıyzy qurylys nysandary boıynsha qalyptasyp otyr eken. Sonymen qatar, bular negizinen respýblıkalyq bıýdjetten bólingen nysanaly transfertter men jergilikti bıýdjet esebinen ıgerilmegen qarajattar ekenin de aıtty. «Jambyl, T.Rysqulov aýdandarynda jáne Taraz qalasynda áli de ıgerilmegen qarajat somasy qalyp otyr. Sondaı-aq, Talas, Merki aýdandarynda da problema bar», deıdi Gamlet Qaınarbekov.
Al oblystyq qurylys, jolaýshylar kóligi jáne avtomobıl joldary basqarmasynyń basshysy Ádilet Ahataevtyń málimetinshe, 47,1 mıllıard teńgeni quraıtyn 273 lotty satyp alý jospary ázirlenipti. Búgingi tańda onyń 256-sy boıynsha kelip túsken ótinimderge konkýrs jarııalanyp, 35 mıllıard teńgeni quraıtyn 195 lot boıynsha jeńimpazdar anyqtalǵan. Sonymen qatar, ótken jyly 1,6 mıllıard teńge únemdelse, bıylǵy bes aıdyń ishinde 1,3 mıllıard qarjy únemdelgen.
О́z sózinde oblys ákimi Asqar Myrzahmetov aldaǵy ýaqytta bólingen qarajattyń alty aıda ıgerilýi jaıyn qaraıtynyn, sondyqtan da bes aılyq qorytyndy kezindegideı jaǵdaıdyń oryn almaýyn qadaǵalaýdy tıisti basshylarǵa tapsyrdy. Sonymen qatar, ákim oblysta 2019 jyldyń bıýdjetine qatysty bıýdjettik komıssııa óz jumysyn bastaǵaly turǵanyn da aıtty.
Hamıt Esaman,
«Egemen Qazaqstan»
Jambyl oblysy
