Shara elordanyń 20 jyldyq mereıtoıy qarsańynda Astanada ótýde. Jarystyń qurmetti qonaqtarynyń qatarynda Qazaqstannyń trıatlon federasııasynyń prezıdenti Kárim Másimov, mádenıet jáne sport mınıstri Arystanbek Muhamedıuly jáne t.b. boldy.
Uıymdastyrýshylardyń aıtýynsha, sport jarysyna álemniń 47 elinen 1300-den astam sportshy qatysty, olardyń 700-ge jýyǵy — qazaqstandyqtar. Qatysýshylar arasynda jarysta alǵashqylardyń biri bolyp márege jetken Olımpıada chempıondary Serik Sápıev pen Aleksandr Vınokýrov, sondaı-aq «Seniń jańa qyryń» qozǵalysynyń kóshbasshysy Valıhan Ten, Kýıla-Konede IRONMAN álem chempıonatyna qatysqan Pavel Artıýshenko, trıatlonshy Tomas Dreıer jáne álemdik trıatlon tarıhyna engen ózge de sportshylar boldy.
Baqytjan Saǵyntaev birinshi júgiristiń absolıýtti chempıondaryn: áıelder arasynda — Dıdra Keısıdi (Deirdre Casey — Irlandııa) jáne erler arasynda — Pıter Volkovıchti (Peter Wolkowicz — Germanııa) quttyqtady. Olar 113 shaqyrym qashyqtyqta úsh úzdiksiz kezeńdi eńserdi.
Sondaı-aq, júldeli oryndardyń jeńimpazdary anyqtaldy: erler arasynda II oryndy Vıktor Aleshın (Reseı), III oryndy Sergeı Hazov (Reseı) aldy. Ekinshi orynda áıelder arasynda Lıýbov Polıanskaıa (Reseı), úshinshi oryndy Izabella Sobanska (Polsha) ıelendi.
IRONMAN — jalpy uzyndyǵy 113 shaqyrym (70,3 mıl) bolatyn júzý (1,9 km), velojarys (90 km), júgirý (21,1 km) sekildi úsh úzdiksiz kezeńnen turatyn bir kúndik jarys. Tolyq qashyqtyqty eńserip shyqqan sportshyǵa «Temir adam» ataǵy beriledi. Trıatlonshylar osy jyldyń qyrkúıek aıynda Ońtústik Afrıkada ótetin álem chempıonatyna qatysý úshin 50 slotqa kúresýde.
