Halyqaralyq, úkimettik emes uıymdardyń jetekshileri, qoǵam belsendileri, bıznes ókilderi, memlekettik organdar men áleýmettik qorlardyń basshylary qatysqan jıyndy Eńbek jáne áleýmettik qorǵaý mınıstri Mádına Ábilqasymova júrgizdi.
Mınıstr búginde elimizde 2 mıllıon 40 myń adam ózin ózi jumyspen qamtyǵandar sanatyna jatatynyn, al 1 mıllıon 800 myń adamnyń áli kúnge eńbek mártebesi anyqtalmaǵandyǵyn atap ótip, osy baǵytta tıisti jumystardyń qolǵa alynǵanyn jetkizdi.
«Qazirgi ýaqytta ózin ózi jumyspen qamtyǵandarǵa arnalǵan jumyspen qamtýdy resimdeý týraly zań jobasy ázirlendi. Zań jobasy aıasynda biryńǵaı jıyntyq tólem engizý josparlanyp otyr. Bizdiń maqsatymyz – ózin ózi jumyspen qamtyǵan azamattar áleýmettik turǵydan qorǵalyp, memleket tarapynan kórsetiletin kómekterge qol jetkizse deımiz», dedi M.Ábilqasymova.
Dóńgelek ústelde sóz alǵan Eńbek jáne áleýmettik qorǵaý mınıstriniń orynbasary Nurjan Áltaev jańadan ázirlengen zań jobasyndaǵy jeńildikterge toqtaldy. Vıse-mınıstr zań jobasy sheńberinde engizilmek biryńǵaı jıyntyq tólem (BJT) tirkeýdi jeńildetip, kedergilerdi azaıtýǵa baǵyttalatynyn tilge tıek etti. «BJT eń aldymen beıresmı ózin ózi jumyspen qamtyǵan azamatty óz qyzmeti týraly habardar etedi. Ekinshiden, jeke tabys salyǵyn, mindetti zeınetaqy jarnalaryn, áleýmettik tólemderdi jáne medısınalyq saqtandyrýdy tóleıtin birden bir qural bolady», dedi ol.
Memleket tarapynan qolǵa alynǵan ártúrli sharalarǵa qaramastan ózin ózi jumyspen qamtyǵan azamattardyń sany azaımaı otyrǵan óńirler de bar. Jıynda sóz sóılegen Qoldanbaly ekonomıkany zertteý ortalyǵynyń ǵylymı jetekshisi Jaqsybek Qulekeev Almaty, Jambyl, Qyzylorda jáne Ońtústik Qazaqstan oblystarynda júrgizilgen zertteý qorytyndysyn jarııa etip, elimizdegi ózin ózi jumyspen qamtyǵan turǵyndardyń 51 prosenti osy óńirlerge tıesili ekendigin aıtty.
Jáne atalǵan tórt oblystyń 2800 turǵyny (ózin ózi jumyspen qamtyǵandar) arasynda saýaldama júrgizilip, nátıjesinde olardyń 61 prosenti resmı tirkelmegeni anyqtalǵandyǵyn alǵa tartty. Sondaı-aq elimizdegi ózin ózi jumyspen qamtyǵan azamattardyń úshten biri Ońtústik Qazaqstan oblysyna tıesili ekendigin, osy óńirdegi aýyl turǵyndarynyń 81 prosenti atalǵan topqa jatatyndyǵyna alańdaýshylyǵyn bildirip, memleket tarapynan tıisti sharalar qoldanylýy kerektigin atap ótti.
Azamat QASYM,
«Egemen Qazaqstan»
