Qyzylorda oblysynyń Jańaqorǵan jáne Shıeli aýdandarynda múddeli memlekettik organdar men qarjy ınstıtýttary ókilderiniń qatysýymen kásipkerlikti damytý boıynsha kóshpeli jıyndar ótti.
Jıyn basynda oblys ákimi Qyrymbek Kósherbaev jappaı kásipkerliktiń damýy turaqty jumys oryndarynyń qurylýyna, salyq bazasynyń kóbeıýine jáne áleýmettik turaqtylyqty qamtamasyz etýge tikeleı áser etetinin atap ótti.
«Bizdiń mindetimiz – aýyldyq jerlerde kásipkerlikti damytý jáne qoldaý, sondyqtan jyl qorytyndysy boıynsha bıyl kásibin bastaǵan ár aýdan men oblys ortalyǵynda úzdik startap-kásipkerlerdi, sondaı-aq, úzdik aýdan ákimi men jaýapty laýazymdy tulǵany 1 mıllıon teńge kóleminde syıaqymen marapattaý týraly sheshim qabyldadyq», - dedi aımaq basshysy.
Sonymen qatar, oblys ákimi qoıylǵan mindetterin oryndaı almaǵan laýazymdy tulǵalar jaýapkershilikke tartylatynyn da eskertti.
О́z kezeginde, aýdan ákimderi men qarjy ınstıtýttarynyń basshylary shaǵyn jáne orta bıznesti damytý barysy týraly baıandap berdi. Atap aıtqanda, Jańaqorǵan aýdanynyń ákimi Ǵalym Ámireev jergilikti mamandar Qyrǵyzstan men О́zbekstannyń jylyjaı bıznesin damytý boıynsha tájirıbesin, sondaı-aq, Qazaq kartop jáne kókónis sharýashylyǵy ǵylymı-zertteý ınstıtýty men ózge de salalyq uıymdardyń ozyq tájirıbelerin engizip jatqanyn baıandady. Odan bólek, aýyldyq jastardy «Zhasproject» startap-jobalardy qoldaý baǵdarlamasyna qatysyp, óz isin bastaýǵa grant jáne jobany júzege asyrý kezinde qarjylyq qoldaý alýǵa tartý boıynsha jumys júrgizilip jatyr. Jańadan kásibin bastaǵan bıznesmender úshin tájirıbe almasyp, óz isin ashýdyń algorıtmin úıretý maqsatynda «Agroekspress» semınary uıymdastyryldy.
Shıeli aýdanynda aǵymdaǵy jyldyń 1 mamyryna 4 658 shaǵyn jáne orta bıznes sýbektileri tirkeldi, onyń ishinde belsendi sýbektileriniń sany 3456. О́tken jyldyń tıisti merzimimen salystyrǵanda jumys istep jatqan shaǵyn jáne orta bıznes sýbektileriniń sany 12,8 paıyzǵa artty. Jyl basynan beri konkýrstyq komıssııa tarapynan jalpy quny 15,3 mln. teńge 24 startap-joba maquldanyp, «О́ńirlik ınvestısııalyq ortalyǵy» uıymy arqyly jalpy quny 117,1 mln. teńge 31 joba qarjylandyryldy.
Jıyn qorytyndysymen oblys ákimi aýdandarda shaǵyn jáne orta bıznesti damytý boıynsha jumysty kúsheıtip, qoldanystaǵy barlyq qoldaý tetikterin tıimdi paıdalanýdy tapsyrdy.
Sondaı-aq, Shıeli aýdanynyń Tartoǵaı aýylynda 90 oryndyq «Qulager» balabaqshasy ashyldy. Buryn balabaqsha aýyldyq mekteptiń eski ǵımaratynda ornalasqan bolatyn.
Esterińizge sala keteıik, Qyzylorda oblysynda 2018 jyl Jappaı kásipkerlikti qoldaý jyly dep jarııalanǵan bolatyn.
Qyzylorda oblysynda 40 myńǵa jýyq naqty jumys isteıtin shaǵyn jáne orta bıznes sýbektileri tirkelgen, bul kórsetkish 2017 jyldyń tıisti kezeńimen salystyrǵanda 10,8 paıyzǵa artty.
Shaǵyn jáne orta bıznes kásiporyndarynda jumyspen qamtylǵandardyń sany 2018 j. 1 qańtaryna 84250 adam, al shyǵarylǵan ónim kólemi 2017 jyldyń qorytyndysymen 302,186 mlrd. teńgeni qurady. 2018 j. qańtar-sáýir aılarynda aımaqta 2476 jeke kásipker, 78 sharýa qojalyǵy jáne 240 JShS quryldy.
Sondaı-aq, óńirde «Bastaý-Bıznes» baǵdarlamasy aıasynda 1600 adamdy oqytý josparlanǵan. Qazirgi tańda qatysýshylardyń alǵashqy legi oqýdy bitirip, bıznes-jobalaryn oblystq komıssııa otyrysynda qorǵady. 291 adam oqý kýrstaryn bitirip, 127-si jobasyn qorǵap shyqty. Taǵy da 800 jýyq kásipker «Bıznes-Keńesshi» jobasy aıasynda oqytylatyn bolady, búgingi kúni oblys boıynsha 1171 adam oqý bitirdi.
