Sharaǵa zerdeli ǵalym Qaldybek Sábdenulynyń zamandas-áriptesteri, shákirtteri, belgili memleket jáne qoǵam qaıratkerleri men bilikti ǵalymdar qatysty. Olar avtordyń jańa kitabynda baıandalǵan ulaǵatty oılardyń, ulttyq qundylyqtar men rýhanı dúnıelerdiń mańyzdylyǵy, óskeleń urpaqqa berer tárbıesi men taǵylymy jaıynda oı qozǵady. Kitaptyń ár bólimine jeke-jeke toqtalyp tyń týyndy jas urpaqtyń boıyna rýhanı tárbıe dánegin egýge taptyrmas qural ekenin aıtty.
– Halqymyzdyń tarıhy men erte zamannan arqaýy úzilmegen ulttyq salt-dástúrleriniń qaımaǵyn osy eńbektiń óne boıynan tabýǵa bolady. Kitaptyń ataýy men ishki mazmuny bir-birine saı, týyndyny qolǵa alǵanda úlken qazynaǵa jolyqqandaı áserge bólendim. Shyǵarmanyń tálimdik, azamattyq bıik óresi men paıym tujyrymdary kimdi bolsyn beı-jaı qaldyrmaıdy. On eki taraýǵa toptastyrylǵan oı órnekteri oıly oqyrmannyń kóńil tórinen oryn alatyny anyq, – deıdi tarıhshy Hangeldi Ábjanov.
Bul eńbekte avtor óz ómiri men qyzmeti, týǵan jeriniń qasıeti men kıesi, eline sińirgen eńbegi týraly jan-jaqty baıandaǵan. Tanymdyq sıpaty mol kitapta ulaǵatty ustaz bilim men ǵylymdy ulyqtap, shejire derekterine taldaý jasaý arqyly ulylylardyń ósıetin pash etedi. Ulttyq tálim-tárbıeniń mańyzy jaıly tolǵanyp, oqyrmanǵa oı salarlyq ónegesimen bólisedi. Kitapta, sondaı-aq, avtordyń ǵylym jolyndaǵy jetistikteri men azamattyq kelbeti týraly qazaq qoǵamyna belgili ǵalymdardyń júrekjardy lebizderi men oı-tolǵamdary da toptastyrylǵan.
Qaldybek Sábdenuly 10 ǵylym doktoryn, 15 ǵylym kandıdatyn daıyndaǵan ǵylymı mekteptiń jetekshisi. 350 den astam ǵylymı eńbektiń, 7 monografııanyń, 18 oqýlyq pen oqý quralynyń avtory. Ǵalymnyń ǵylymı jumystarynyń negizgi deni mal sharýashylyǵynyń ónimdiligin arttyrýǵa, eńbek ónimdiligin joǵarylatýǵa, mal sharýashylyǵyndaǵy eńbekti jeńildetýge, mehanıkalandyrý men avtomattandyrýǵa, maldy baǵyp-kútý, ósirý tehnologııasyn jańartýǵa baǵyttalǵan.
Kórgeni men túıgeni kóp ustazdy múlde basqa qyrynan tanytatyn aıtýly eńbek aty aıtyp turǵandaı qazaqy qasıet pen kıeniń qadir-qasıetin tereńnen uǵynýǵa talpyndyrady. Ulttyq bolmys pen izgi qasıetterge baýlıtyn oramdy oılar oqyrman qaýymdy tanym kókjıegine jeteleı beredi dep senemiz.
Arman OKTIаBR,
«Egemen Qazaqstan»
ALMATY
