Jıynda B.Asylova stýdentterdi turaqty jatyn orynmen qamtamasyz etý boıynsha mańyzdy sharalardyń atqarylyp jatqandyǵyna toqtaldy. Búgingi kúni respýblıka boıynsha jalpy 83 myń oryn, onyń ishinde Ońtústik Qazaqstan oblysynda – 11 myń, Astana qalasynda – 17 myń jáne Almaty qalasynda 23 myń oryndyq jataqhana salý qajettigi anyqtalǵan. Jataqhanalardy salýǵa jer telimderin bólý jumystary jergilikti ákimdiktermen birlesken túrde sheshimin tappaq. Qazirgi tańda bilim berý mekemeleriniń aýmaǵynda nemese olarǵa jaqyn mańdaǵy jerlerden 134 jer telimi bólingen.
– Sondaı-aq biz jataqhanalar qurylysynyń mehanızmin anyqtadyq. Qurylys salýshy − jataqhana jobasyn ázirleıdi. Keıin memlekettik tapsyrysty alý úshin Qarjy ortalyǵymen kelisimshart jasasady. Budan soń bankten qaryz alady. Al jataqhanany paıdalanýǵa bergennen soń memleketten ótemaqy tólenedi, – dep málimdedi vıse-mınıstr.
Jataqhanalar jobalaryn ázirleý rásimin jeńildetý úshin Qurylys jáne turǵyn úı-kommýnaldyq sharýashylyq isteri komıteti úlgi retindegi joba ázirlep, ol búginde barlyq ákimdikterge taratylǵan. Sonymen qatar Bilim jáne ǵylym mınıstrligi múddeli memlekettik organdarmen birlese otyryp, bıznestiń jol kartasyna jataqhana qurylysyn qosý arqyly bankterden tómen paıyzdyq nesıe alý máselesin pysyqtaý ústinde.
– Eger Parlament zańǵa túzetýlerdi tamyzda qabyldasa, onda mınıstrliktiń normatıvtik-quqyqtyq aktilerin retteýge taǵy bir aı ketedi. 2019 jyldyń qyrkúıek aıyna qaraı 5 000 oryndy paıdalanýǵa berýdi kózdep otyrmyz. Bul bizdiń optımıstik boljamymyz, – dedi B. Asylova.
Ulttyq testileý ortalyǵynyń dırektory Ramazan Álimqulovtyń aıtýynsha, bıylǵy jylǵa arnalǵan Ulttyq biryńǵaı testileýdiń suraqtary 50 paıyzǵa jańarǵan. – Bıyl UBT 15-shi ret óteıin dep otyr. Osy ýaqyt aralyǵynda shamamen 1,5 mln túlek testileýge qatysqan bolatyn. Qazirgi ýaqytta 2018 jyldyń UBT-syna daıyndyq shtattyq rejimde júrgizilip jatyr. Barlyq aýdıtorııalar daıyn. Úsh mindetti pán bolady: Qazaqstan tarıhynan 20 suraq, saýatty oqýdan 20 suraq, matematıkalyq saýattylyqtan 20 suraq jáne tańdap alynǵan 2 pánnen 30 suraqtan bolady, − dedi ol.
Ortalyq basshysynyń aıtýynsha, búginde respýblıkalyq apellıasııalyq komıssııanyń músheleri iriktep alynǵan. Oǵan 54 adam kirip otyr. – О́tken jyly UBT-nyń test tapsyrmalary 40 myń bolsa, sonyń 98 suraǵy, ıaǵnı 0,02 paıyzy ǵana daý týdyrdy. Álemdik tájirıbede 1 paıyzǵa deıin qalypty bolyp esepteledi. Biz bul durys kórsetkish dep sanaımyz. Bıyl test suraqtarynyń bazasy 50 paıyzǵa jańardy, ıaǵnı UBT-da 80 myń suraq bolady, – dedi ol.
Onyń aıtýynsha, byltyr 198 apellıasııalyq shaǵym tússe, onyń 50 paıyzy tehnıkalyq máselelerge qatysty bolypty. Suraqtar mazmunyna qatysty 98 másele kóterilip, óz sheshimin tapqan.
Erkejan AITQAZY,
«Egemen Qazaqstan»
