Jahan jańalyqtary. Nýrmagomedov pen MakGregor kúzde aıqasady

«Eki tarap boıynsha kelissózder áli júrip jatyr. Jekpe-jek ýaqytyn 6 qazanǵa josparlap otyrmyz. Aldaǵy josparda tórt kezdesý bar. Konor, Tonı Fergıýson, Sen-Per jáne jartylaı orta salmaq chempıonymen», dedi A.Nýrmagomedov. 

Osyǵan deıin Habıb Nýrmagomedov 6 qazanda jekpe-jek ótkizetini týraly aıtyp qalǵan bolatyn. Ol bul kezdesýde sáýir aıynda amerıkalyq sportshy El Iаkvıntadan jeńip alǵan chempıondyq beldigin qorǵaıtyn bolady.

Federer 98-jeńisine qol jetkizdi

Shveısarııalyq tennısshi Rodjer Federer Shtýtgartta ótken týrnırde jeńimpaz atandy. Fınaldyq saıysta Federer kanadalyq Mılosh Raonıchpen kezdesip, 6:4, 7:6 esebimen jeńiske jetti.

Bul 36 jastaǵy Federerdiń mansabyndaǵy 98-shi, al osy maýsymdaǵy úshinshi jeńisi. Ol osy jyldyń aqpan aıynda 2012 jyldan beri birinshi ret álemdik tennıs reıtıngisinde birinshi orynǵa kóterilip, ATR tarıhynda birinshi orynǵa shyqqan jasy eń úlken (36 jas 6 aı) tennısshi atandy.

Rodjer bıylǵy reıtıngide 7 apta boıy birinshi orynnan túsken joq. Ol eń alǵash 2004 jyly reıtıngide alǵashqy orynǵa shyǵyp, 309 apta boıy óz ornyn eshkimge bergen joq edi.

Reseıge traktormen keldi

Germanııalyq qart fýtbol jankúıeri Gýrbert Vırt Reseıde ótip jatqan fýtboldan álem chempıonatyn tamashalaý úshin traktormen kelgen.

Vırt Germanııanyń Forhhaım qalasynan Máskeýge deıingi aralyq­ta­ǵy 2,5 myń shaqyrym joldy júrip ótken. Ol mingen traktor 1936 jyly qurastyrylǵan. «Reseı joldarynda eshqandaı keleńsizdikke tap kelgen joqpyn. Jol boıy tek bes márte ǵana jol polısııasy toqtatty. Onyń bireýi estelik sýretke túsý úshin», deı­di Vırt.

Jeksenbi kúni álem chempıo­na­ty­nyń «F» tobyndaǵy Germanııa – Meksıka kezdesýi Máskeýdegi «Lýjnıkı» stadıonynda ótip, mek­sı­kalyq fýtbolshylar 1:0 esebimen je­ńiske jetken bolatyn. Oıyn aldyn­da Máskeý qalasynyń sport já­ne týrızm departamentiniń basshy­sy Nıkolaı Gýlıaev Vırtke Germanııa-Meksıka matchyna bılet berdi.

Daıyndaǵan

Álı BITО́RE,
«Egemen Qazaqstan»