Shymkent memlekettik zoologııalyq saıabaǵyn jańǵyrtý maqsatynda qaıta qurý jumystary júrgizilip, kúni keshe «Afrıka» aımaǵy ashyldy. Jalpy, «Afrıka» zoologııalyq aımaǵynyń qurylys jumysy ótken jyldyń sáýir aıynda bastalǵan. Joba quny – 627 114 000 teńge. Bul jaqta kemirgishter, sıraqty qustar, jyrtqysh mysyqtar men baýyrymen jorǵalaýshylar – afrıkalyq savannada mekendeıtin janýarlar úshin 8 turaq salynǵan. Volerge jaqyn jerge sýsıyr ornalasqan. Tabıǵatqa meılinshe jaqyndastyrylyp jasalǵan aımaq janýarlar úshin yńǵaıly. Pavılondar ashyq tabıǵı ortaǵa beıimdelgen. Zoobaq dırektory Nurǵazy Buharbaevtyń aıtýynsha, «Afrıka» aımaǵy elimiz turmaq, TMD elderinde joq joba.
Aıta keteıik, Shymkent zoobaǵy sırek kezdesetin jáne joıylyp bara jatqan jan-janýarlardy saqtap, olardy kóbeıtý maqsatynda 1980 jyly qurylǵan. Ol kezde zoobaqta 75 túrli ań bolsa, búginde 249 túrli 2 565 janýarǵa jetken. Jalpy aýmaǵy – 29 gektar, onyń 19 gektary túrli ekspozısııaǵa arnalǵan saıabaqtaǵy «Afrıka» aımaǵynyń ashylýyna baılanysty jan-janýarlarmen tolyqtyrý maqsatynda «Eýrazııa» quramyndaǵy zoobaqtardan ańdarǵa taǵy suranys berilgen. Iаǵnı ań túrleriniń sany taǵy da artpaq. Sondaı-aq munda kelýshiler sany da jyl saıyn arta túsýde. Mysaly, 2017 jyly kelýshiler sany 426 myńǵa jetse, osy jyldyń 3 aıynda 60 myńnan astam adam kelgen. Aıtpaqshy elordanyń 20 jyldyǵyna Shymkent qalasynyń turǵyndary atynan Astana qalasyna janýardyń 20 túri jetkizilmek. Naqtyraq aıtsaq, elordaǵa Shymkentten arystan, Amýr jolbarysy, pýma, qońyr aıý sekildi jyrtqyshtar men kezquıryq, tilemish, tazqara, úki qustary jáne basqa da janýarlar tartý etilmek.
Ǵalymjan ELShIBAI,
«Egemen Qazaqstan»
Ońtústik Qazaqstan oblysy
