Atyraý qalasyndaǵy 41433 jáne Beıneý aýdanyndaǵy 99116 áskerı bólimderinde 100-ge jýyq jas sarbaz, alǵashqy áskerı daıyndyǵyn aıaqtap saltanatty túrde áskerı ant qabyldady. Saltanatty áskerı ant qabyldaý rásimine Qazaqstan Respýblıkasy Qarýly Kúshteriniń ardagerleri shaqyrylyp, sarbazdarǵa ózderiniń aq tilekterin bildirdi.
Sarbazdar Almaty qalasy jáne Almaty oblysynan shaqyrylǵan bolatyn. Áskerı qyzmetshilerdiń ant qabyldaý rásimine kýáger bolýǵa shalǵaıdaǵy ata-analary men týǵan týysqandary keldi.
- Bul bizdiń otbasymyz úshin óte erekshe kún, sebebi bizdiń ulymyz kishkentaı kezinen beri ásker qataryna baram dep aıtyp júretin, endi mine armany oryndaldy. Balama tek qana óz áskerı boryshyn abyroımen ótkizýdi tileımin, - dedi jas sarbaz, qatardaǵy jaýynger Eldos Temirhannyń anasy Roza Qulmanova .
99116 áskerı bóliminiń komandıri podpolkovnık Rınat Kalıevtiń aıtýynsha, ant qabyldaý rásimi erekshe áskerı salttardyń biri bolyp sanalady, bul sát áskerı qyzmetshilerdi Otanyn súıýge jáne týǵan jerdiń patrıoty bolýǵa yntalandyrady.
Ant qabyldaý rásiminen keıin, sarbazdardy alystan kelgen ata-ana, týǵan-týystarymen birge seıilge jiberdi, endi olar tek bir jyldan soń ǵana qaýyshatyn bolady.
Ásker qataryna ata-babalarymyzdyń jaýyngerlik rýhyna saı, olardyń abyroıyn túsirmeıtin, Qazaqstan Respýblıkasyna adal qyzmet etetin, dene daıarlyǵy myqty, bilimdi, ór minezdi sarbazdar ǵana shaqyrylýda.
Gúlaıym Shyntemirqyzy,
"Egemen Qazaqstan"
Mańǵystaý oblysy
