Elordada ken oryndaryn ıgerý jáne paıdaly qazbalar salasynda jumys isteıtin sondaı-aq, qorshaǵan ortany qorǵaý jáne ónerkásiptik qaýipsizdik ǵylym men tehnıkanyń, bıznes salasynyń mamandary jáne ǵalymdary jınaldy.
«Úlken materıaldyq-shıkizat áleýeti men úlken taý-ken óndirýshi ónerkásipteri bar bizdiń el úshin bul is-sharanyń úlken máni bar. Bul kezdesý Kongrestiń 60 jyldyǵy jáne Astana qalasynyń 20 jyldyq mereıtoıy qarsańynda ótýde. Búginde taý-ken óndirisi jáne óńdeý ónerkásibi Qazaqstan ekonomıkasyna iri úles qosýda. Bul saladaǵy 800 kásiporynda 185 myń adam jumys jasaıdy. О́ndirýshi jáne óńdeýshi ónerkásipti jyldam keńeıtý elimizdiń damýyna kómektesedi», – dedi QR Premer-Mınıstriniń birinshi orynbasary Asqar Mamın.
Onyń sózinshe, Elbasy Nursultan Nazarbaev halyqaralyq ınvestorlardyń qatysýyn keńeıtý úshin taý-ken sektoryn reformalaý jónindegi múmkindikter jasaýǵa tapsyrma bergen.
«Al osy baǵytta sheteldik ınvestorlardyń kelýine jol kórsetý úshin jáne barlyq kompanııalarǵa birdeı sapaly qyzmet kórsetý maqsatynda «Astana» qarjy ortalyǵy quryldy. Qazaqstanda taý-ken salasynyń múmkindigi mol», deıdi Asqar Mamın.
Kongress «Innovasııalyq basymdyq – álemdik taý-ken ónerkásibiniń ósý jolynda jasalǵan qadam» taqyrybynda ótýde jáne geologııalyq barlaý, óndirý jáne baıytý, táýekelderdi baǵalaý, salany sıfrlandyrý, jańa tehnologııalardy engizý, halyqaralyq qarjylandyrýdy tartý jáne t.b. máselelerdi qamtýda.
Is-sharaǵa Avstralııa, Avstrııa, Kanada, Polsha, Norvegııa jáne Fransııadan delegasııa, álemniń ǵylymı jáne isker qoǵamdastyqtarynyń jetekshi sarapshylary, ınvestorlar men qarjy ınstıtýttary, sondaı-aq Úkimet basshylary bar 46 el, 56 profıldik qaýymdastyq, 41 ýnıversıtet qatysýda.
