Sharaǵa Bilim jáne ǵylym vıse-mınıstri Ashat Aımaǵambetov, «Ulttyq testileý ortalyǵy» RMQK dırektory Ramazan Álimqulov qatysty.
«Jalpy elimizdiń barlyq mektepterinde oqý jyly oıdaǵydaı aıaqtaldy dep aıta alamyz. Memlekettik emtıhandar tapsyrylyp kúni keshe ǵana mekteptiń barlyq túlekteri ózderiniń attestattaryn qoldaryna aldy. 2017-2018 oqý jylynda 147 023 túlek orta mektepti bitirip, 29 mamyr - 9 maýsym aralyǵynda qorytyndy attestasııany tapsyrdy. Elimizdiń 7 myńnan astam oqý oshaqtarynda 2 mln 900 myń oqýshy oqıdy. Sonymen qatar osy jyly «Altyn belgi» tósbelgisine úmitker 6 892 túlektiń 6 780-i (98,4 paıyzy) óz bilimderin rastap, «Altyn belgi» tósbelgisin aldy. Úzdik attestatqa úmitker 4966 úzdik bitirýshiniń 4915-i (99 paıyzy) óz bilimderin rastady. Bıylǵy oqý jylynda 1,2,7 synyp oqýshylary jańartylǵan bilim júıesiniń oqýlyqtarymen bilim aldy. Oqýshylardyń bilim sapasy jaqsardy. Jalpy, oqý jyly jaqsy kórsetkishtermen, sátti aıaqtaldy», dedi Bilim jáne ǵylym vıse-mınıstri Ashat Aımaǵambetov.
Sonymen qatar ol Elektrondy jýrnal engizilgennen keıin el ishinde qyzý talqylaý oryn alyp, keıbir bilim berý mekemelerinde elektrondy túrde de, qaǵaz túrinde de eki túrli jumys jasap jatyrmyz degen shaǵymdar túskenin jetkizip, mınıstrlik tarapynan máseleni sheshý jumystary jasalyp jatqanyn atap ótti.
«Eger mektepte elektrondy jýrnal qoldansa, onda qaǵaz kúıinde qoldanylmaıdy. Al, keń jolaqty ınternet joq eldi mekender jýrnaldyń qaǵaz júzindegi nusqasyn qoldana beredi. Aıta ketetin taǵy bir jaıt, bıyl UBT 15-ret ótkizilgeli otyr. Osy jyldyń ishinde elimiz de, mektepter de testileý júıesin tolyq ıgerdi. Osy jylǵy test talaptarynda ózgeris joq. Balalardyń oılaý júıesin damytý úshin test suraqtaryn 50 paıyzyn jańarttyq», dedi ol.
Raýan QAIDAR,
«Egemen Qazaqstan»
