Mınıstr mınıstrliktiń qyzmeti 3 strategııalyq baǵytqa negizdelgenin alǵa tartyp, birinshi, munaı-gaz jáne munaıgaz-hımııa salalary, ekinshisi, elektr energetıka, kómir jáne atom energııasyn paıdalaný salalaryn damytý, úshinshisi, qorshaǵan ortany qorǵaýdy jaqsartý ekenin jetkizdi.
Sonymen qatar ol Gaz ónerkásibin damytý jáne gazdandyrý máselesi mınıstrliktiń kún tártibindegi mańyzdy salanyń biri ekenin atap ótti.
«Eldi gazdandyrý deńgeıi shamamen 47,4 paıyzdy quraıdy. 1300-den astam eldi meken gazǵa qol jetkizdi. Respýblıkalyq bıýdjetten gazdandyrýǵa jyl saıyn shamamen 13 mlrd. teńge bólinýde. Búginde, 16 óńirdiń ishinde ortalyq jáne soltústik óńirleri ǵana gazdandyrý shemasynan tehnıkalyq shekteýlerge baılanysty tys qalyp otyr. Elbasynyń Bes áleýmettik bastamasynyń arqasynda Astana, Qaraǵandy jáne Aqmola oblystaryn gazdandyrý máselesi sheshilýde. Bıyl shilde aıynyń basynda «Saryarqa» magıstraldyq gaz qubyryn saltanatty ashý josparlanýda. «Qyzylorda-Jezqazǵan-Qaraǵandy-Temirtaý-Astana» baǵyty boıynsha birinshi kezeń 2019 jyldyń jeltoqsan aıyna deıin aıaqtalady. Birinshi kezeńiniń shamamen quny 267 mlrd-tan astam teńgeni qurady. Qaraǵandy, Aqmola oblystary men Astana qalasy ákimdikteri magıstraldy gaz qubyry men aımaqtyq jeliler qurylysynyń merzimin eskere otyryp, ınfraqurylym qurylysy úshin Jol kartasyn ázirledi. Birinishi kezeńde gaz qubyry boıynsha 171 eldi meken qamtylyp, 2,7 mıllıon adam gazben qamtamasyz etiledi. Elorda turǵyndary úshin, eń aldymen, gazdy «Kóktal-1,2», «Jeleznodorojnyı», «Iýgo-Vostok» aýdandaryna, jáne birinshi, ekinshi, úshinshi Jylý elektrostansııalaryna jetkizý josparlanýda. Suıytylǵan munaı gazyn baǵalaý jáne bólý tetigin jetildirý úshin elektrondy saýda alańyn engizý josparlandy. Qazir zańnamalyq normalar ázirlendi. Zań jobasy Parlament Senatynda qaralýda», dedi Q.Bozymbaev.
Mınıstrliktiń taǵy bir nazaryn aýdarýdaratyn mańyzdy baǵyty munaı-gaz hımııa ónerkásibi ekeni belgili.
«Jyldan jylǵa bıtým óndirisiniń kólemi artyp, ishki suranysty tolyq qamtamasyz etýde. 2017 jyly 731 myń tonna bıtým óndirildi, bul 2016 jylmen salystyrǵanda eki esege kóp. 2018 jylǵa 750 myń tonna bıtým shyǵarý josparlanýda. 500 myń tonna polıpropılen jáne 1 250 000 tonna polıetılen óndiretin iri jobalardy júzege asyrý jalǵasýda. Polıpropılen jobasynyń qurylys kezeńi iske asyrylýda. Al,polıetılen jobasy boıynsha strategııalyq áriptesi - avstrııalyq Borealis kompanııasymen tehnıkalyq-ekonomıkalyq negizdeme ázirlenýde. Eki jobaǵa ınvestısııa kólemi 9 mıllıard dollardan asady. Qurylys kezeńinde shamamen 10 myń jumys orny jáne jumys berilgen kezde 1000-nan astam jumys oryndar paıda bolady. Statıstıkaǵa sáıkes, bizdiń polıpropılen ımportymyz 22,4 myń tonna, polıetılen - 122 myń tonnany quraıdy. Búginde elimizde polımerden ónim shyǵaratyn shamamen 44 iri jáne orta kásiporyn bar. Olar jalpy alǵanda 176 mlrd. teńgeni quraıdy. Bul kásiporyndarda 5000-nan astam adam jumys isteıdi», dedi ol.
Sonymen qatar, Energetıka mınıstri Qanat Bozymbaev Biryńǵaı elektr energetıkasy júıesindegi jaǵdaı turaqty, búginde tutyný kóleminiń ulǵaıýynan óndiriletin elektr energııasynyń kólemi artyp kele jatqanyn jetkizdi.
«Elektr energııany óndirý kólemi 46,4 mlrd. kVt.saǵ qurady. Bul 2017 jyldyń sáıkes kezeńine qaraǵanda 7,7 paıyzdyq ósim kórsetti. Energııa óndirýshi kompanııalardyń syıymdylyq rezerviniń bolýy 2025 jylǵa deıin ekonomıkanyń bolashaq suranysyn elektr energııamen qamtýǵa múmkindik beredi. Aıta ketý kerek, biz energııa óndirýshi kompanııalardyń shekti tarıfterin qaıta qaraý boıynsha jumystar júrgizýdemiz. Búgingi tańda, shekti tarıfterdi tómendetý boıynsha usynystar Úkimet qaraýynda. 2018 jyldyń sońyna qaraı «Nurly jol» baǵdarlamasy boıynsha, Soltústik-Shyǵys-Ońtústik joǵary voltty elektr berý jelisi qurylys jobasynyń ekinshi kezeńi aıaqtalady. Atalǵan joba eldiń ońtústik óńirleriniń elektr sapasyn jaqsartady. Kómir ónerkásibinde de ósim baıqalady. Osy jyldyń 5 aıynda 44,5 mln. tonna kómir óndirildi. Bul ótken jyldyń sáıkes kezeńimen salystyrǵanda 4,5 paıyzdan joǵary.2017 jyly jospar kórsetkishinen 5,7 paıyzǵa artyq ıaǵnı 23,4 myń tonna ýran óndirildi. Ýran óndirýdiń osy jylǵy jospary 21,6 myń tonna kóleminde», dedi vedomstvo basshysy.
Raýan QAIDAR,
«Egemen Qazaqstan»
