Chempıonnyń jeńilýi, ózge favorıtterdiń upaı joǵaltýy, aýtsaıderlerdiń batyldyǵy – bári de qalyń kórermenniń kóńilinen shyǵýda. Álemdik baspasózde Reseıdiń jarysty jaqsy uıymdastyryp jatqany sóz boldy. Ásirese aǵylshyn jankúıerleri dán rıza. Olar bul memleketke qorqaqtap kelgeni ras. 2016 jyly Fransııa jerinde ótken Eýropa chempıonatynda Reseı men Anglııa fanattary qaqtyǵysyp, Ulybrıtanııa azamaty sol oqıǵadan kóz jumdy. Biraq Tumandy Albıonnan kelgen 2500 jankúıer reseılikterdiń olardy jaqsy qabyldap, qonaqjaılyq tanytqanyn aıtyp, tańǵalýda.
Chempıonatta bolǵan jaǵymsyz oqıǵa – Máskeýdegi taksı júrgizýshisiniń jol jıegine shyǵyp, 7 adamdy qaǵyp ketkeninen bastaldy. Qyrǵyzstan azamaty Shyńǵys Anarbek óz kinásin moınyna alyp, keshirim surady. Sot sheshimmen ol 2 aıǵa bas bostandyǵynan aıyryldy.
Al «Iýventýs» bolsa alǵashqy oıynda jarq etip kóringen reseılik oıynshy Aleksandr Golovınmen kelissózderdi bastady. Orys oıynshysy ıtalııalyq klýbqa aýysýǵa qarsy emes. Tek máskeýlik SSKA jartylaı qorǵaýshy úshin 25 mıllıon eýro surap, týrındik klýb berip otyrǵan 17 mıllıondy azsyndy. Qarjylaı daǵdarysqa ushyrap júrgen áskerı klýb satyp alýshy 20 mıllıon usynsa, fýtbolshysyn satýǵa daıyn.
Saýd Arabııasy quramasy keleńsiz oqıǵaǵa tap boldy. Peterbordan Rostovqa ushý barysynda olar otyrǵan áýe kemesin órt shaldy. Tikushaqtyń bir qozǵaltqyshy isten shyǵyp, áýejaıǵa áreń degende qondy. Keıinnen anyqtalǵandaı, tikushaqtyń jeldetkishine qustar kirip ketipti. Saýd Arabııasy quramasy búgin 21:00-de Ýrýgvaımen kezdesedi.
Reseıdegi álem chempıonatynda taǵy bir rekord jańardy. Meksıka quramasynyń kapıtany Germanııaǵa qarsy oıynda alańǵa kirip, óziniń 5-birinshiliginde dop tepti. Mundaı rekord osyǵan deıin tek 2 ǵana fýtbolshyda bolǵan. Meksıkalyq ardager endi Antonıo Karbahal men Lottar Matteýstermen bir tizimde turady.
Argentına – Islandııa arasyndaǵy oıynnyń telekórsetilimi óte kóp aýdıtorııa jınaǵany anyq. Jaryq kórgen bir statıstıkaǵa nazar salsaq, muz aralynyń halqy osy oıyndy tegis kóripti. 360 myń halqy bar araldyń televızııasy bul oıyndy memlekette turatyn azamattardyń 99,6 paıyzy kórgenin rastady. Kishkentaı araldyń úlken jetistigi jaıly kúlli memleket kórip, bilip otyr degen sóz.
Sonymen 1-týrda kózge túskender qataryna Meksıka, Reseı, Iran, Serbııa jáne Horvatııa quramalaryn aıtamyz. О́z oıyndarynda jeńiske jetip, toptarynda birinshi orynda tur. Alǵashqy týrda joly bolmaı, kóptegen qaýipti sátti golǵa aınaldyra almaǵan Lýıs Sýares Ýrýgvaı jankúıerleriniń tarapynan syn sadaǵyna ilindi. Messıdiń penaltı soqpaýy keshirimdi bolǵanymen, oǵan da artylyp jatqan jaýapkershilik mol. Oıyn boıy jaraqat almaýdy oılaǵan Neımar jankúıerlerdiń ekiudaı sezimin týdyrdy. Alaıda Brazılııa quramasy áli eshteńe joǵaltqan joq. Aldaǵy eki oıyndy jeńse, «selesao» fanattary bárin umytar edi. Kezinde ataqty oıynshy bolǵan Erık Kantona Neımardyń shash úlgisin mazaq etip, áleýmettik jelide parodııa jasady. Fransııalyq ardagerdiń bul qylyǵy Neımardyń jeke jankúıerleriniń shamyna tıgeni anyq.
2-týrda bizdi Argentına – Horvatııa, Serbııa – Shveısarııa, Polsha – Kolýmbııa arasynda ótetin tartysty ári mańyzdy matchtar kútip tur.
Ermuhamed MÁÝLEN,
«Egemen Qazaqstan»
