«Kýrochka rıaba» qus fabrıkasynyń demeýshiligimen júzege asqan qaıyrymdylyq sharasyna kópshiliktiń dán rıza bolǵanyn aıtýymyz kerek. «Bizdiń qyzmetkerlerimizdiń deni osy aýylda turatyn bolǵandyqtan, aýyzashar dastarhanyn da osy aýmaqta uıymdastyrǵandy jón sanadyq. Buǵan jumysshylarymyz da belsene atsalysqanyn jetkizgim keledi», deıdi kásiporyn jetekshisi Maksım Bojko.
Keń jaıylǵan dastarhanǵa kópshiliktiń rızashylyǵy sheksiz, olar uıymdastyrýshylarǵa aq tilegin jaýdyryp, jyly lebizderin bildirdi. «Men bala kezimnen qazaq ultyndaǵy balalarmen dos bolyp óstim. Musylmandardyń osy aıynda adamdardyń bir-birine jaqsylyq jasaýǵa, qol ushyn tıgizýge, kómektesýge umtylatynyn biletinmin. Osyndaı izgi amaldy tý etken sanaýly kúnderde biz de kópshiliktiń alǵysyn alǵymyz keldi. Sondyqtan kúni boıy aýyz bekitetin musylmandardyń aldyna barynsha mol, olar úshin adal azyq-túlik usynýdy jón kórdik. Meniń ultym, dinim musylmandarmen qarym-qatynasyma esh kedergi emes, men olarmen árdaıym birgemin. Qazaqstanda barlyq dástúrli dinniń tatýlyǵy, dostyǵy berik saqtalǵan. Bul – bizdiń Prezıdentimizdiń biregeı saıasatynyń jemisi», dep aǵynan jaryldy «Kýrochka rıaba» qus fabrıkasynyń basshysy.
Is-sharadan soń, kásibı ádetimizge saı Maksımnen sharýashylyǵynyń tynys-tirshiligi týraly suraǵan edik. Ol 2008 jyly muhıttyń arǵy jaǵyndaǵy AQSh-tan «Bolashaq» baǵdarlamasymen bilim alyp kelgen eken. Týǵan jerine kelgen soń, nemen aınalysýdy oılastyrady. Ol qazaqstandyq bıznestegi tyń baǵyttardyń biri – qus ósirý sharýashylyǵyn qolǵa alýdy uıǵardy. Sol kezde Arqalyqtan qus fabrıkasyn ashý ıdeıasy týdy. Artynan Qaraǵandy qalasynan dál osyndaı ıgi jobany júzege asyrady.
Bul kúnde alǵashqysynan jylyna 120 mıllıonnan asa, keıingisinen 150 mıllıonǵa jýyq ónim alady eken. «Biz munymen toqtap qalǵan joqpyz. Jezqazǵandaǵy taǵy bir qańyraǵan qus fabrıkasyn qalpyna keltirdik. Kompanııamyzdyń eń úlken jobasy 2016 jyly Astananyń irgesindegi Aqmol aýylynda bastaldy. Biz munda jylyna óndiris kólemi 20 myń tonna bolatyn qus etin shyǵaratyn kásiporyndy iske qospaqpyz. Al bul elordanyń qus etine degen qajettiligin júz paıyzǵa jabýy tıis. О́nimderimiz Qazaqstanda eń úzdikterdiń qatarynda», deıdi Maksım.
Fabrıkanyń tutynýshylary kún sanap artýda. Bul sala Maksımniń ómiriniń mánine aınalyp úlgergen. Onyń maqsaty tutynýshylardy sapaly ónimmen qamtamasyz etip, óndirisin odan ary ulǵaıtý. Búginde fabrıkanyń ónimderi Reseı, Qyrǵyzstan, Tájikstan, tipti Aýǵanstan elderine satylady. О́nimderiniń ózindik quny tómen, óıtkeni, jem-azyqtyń negizgi bóligin kompanııa ózderi óndiredi.
«Bizdiń artyqshylyǵymyz – Astanaǵa jaqyn turǵandyǵymyz. Áriptesterim negizinen sharýashylyq jumystarymen aınalyssa, men jańalyqtar engizýge kúsh salamyn», degen Maksım Qazaqstandaǵy kásipkerlik salasyna qoldaý sharalaryna qýanatynyn jetkizdi.
