Is-sharaǵa «Atameken» Ulttyq kásipkerler palatasy Tóralqa tóraǵasy Tımýr Qulybaev, «Atameken» Ulttyq kásipkerler palatasy Isker áıelder keńesiniń tóraıymy Lázzat Ramazanova qatysty.
Jıynda sóz sóılegen T.Qulybaev áıelderdiń memleket damýyna qosqan úlesin, sonymen qatar kooperasııa qurýdyń mańyzdylyǵyn atap ótti.
«Jappaı kásipkerlikti damytý men áleýmettik ıntegrasııaǵa mýltıplıkatıvtik áser ete otyryp ár kooperasııa janynda bıznes ekojúıe qalyptasty. Osy bastamaǵa bizdiń kásipker áıelder – Isker áıelder keńesiniń músheleri belsendi qoldaý bildirdi. Qazirgi tańda elimizdegi shaǵyn jáne orta bıznes kompanııalarynyń 60 paıyzyna jýyǵyn áıelder basqarady eken. Bizde áıelderdiń kásipkerliktegi belsendiligi joǵary dep aıtýǵa tolyq negiz bar», dedi T.Qulybaev.
О́z kezeginde L.Ramazanova áıelder kásipkerligi damýyna arnalǵan birqatar baǵdarlamalardyń iske asyralatyny týraly jetkizdi. Sonymen qatar áıelder kásipkerligin qoldaý qoryn qurý bastamasy jaıynda habarlady.
«Mundaı qordy qurý shaǵyn nesıeleý mehanızmi arqyly qarjy kózderine qoljetimdilikti arttyrady. Buǵan qosa Qor ınvestısııalyq ári tıimdi sheshimder qabyldanatyn, qajetti oqý kýrstary men bıznesti súıemeldeý júrgiziletin áıelder keńesiniń oı-talqy ortalyǵyna aınalmaq», dedi L.Ramazanova.
Kongress barysynda Qazaqstannyń túkpir-túkpirinen kelgen isker áıelder óz tájirıbelerimen bólisip, bilgenderin ortaǵa salyp, túrli taqyryptarda baıandama jasady.
Kongrestiń qorytyndysy boıynsha «Atameken» UKP jáne ERG Eýrazııalyq toby ózara túsinistik pen áıel kásipkerligin damytý men qoldaý máseleleri boıynsha áriptestik jónindegi memorandýmǵa qol qoıdy. Atalǵan qujatqa sáıkes, Eýrazııalyq top «Atamekenge» qaıtarymsyz negizde qarjylyq qoldaý kórsetedi.
Abaı ASANKELDIULY,
«Egemen Qazaqstan»
