Jıynǵa Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova, memlekettik qyzmet departamentiniń dırektory Jarqyn Tileýkenov, memlekettik qyzmet departamentiniń sarapshysy Jandarbek Moldashev qatysty.
Shara barysynda «Qazaqstan Respýblıkasynyń úzdik memlekettik qyzmetshisi» respýblıkalyq konkýrsynyń jalpy qorytyndysy, qatysýshylar men jeńimpazdary jaıynda aqparat berilip, merekege oraılastyrylǵan saltanatty is-sharanyń jańa formaty jaıynda sóz qozǵaldy.
«Elbasy jıyrma jyl buryn taǵdyrly sheshim qabyldady. Elordamyz Almaty qalasynan Aqmolaǵa kóshirildi. Bul data bizder úshin óte mańyzdy. О́ıtkeni osydan jıyrma jyl buryn bizdiń Memlekettik qyzmet isteri jáne sybaılas jemqorlyqqa qarsy is-qımyl agenttigi de qurylǵan bolatyn. Sondyqtan bıyl biz de jıyrma jyldyq mereıtoıymyzdy atap ótemiz. Osy oraıda Memlekettik qyzmet isteri jáne sybaılas jemqorlyqqa qarsy is-qımyl agenttigi jyl basynan beri túrli is-sharalar ótkizgen bolatyn.
Olardyń barlyǵy Prezıdent Ákimshiliginiń qoldaýymen júzege asty. О́tkizilgen sharalardyń ishindegi mańyzdysy – «Qazaqstan Respýblıkasynyń úzdik memlekettik qyzmetshisi» respýblıkalyq konkýrsy. Biz atalǵan baıqaý týraly sáýir aıyndaǵy baspasóz máslıhatynda jan-jaqty aıtyp ótkenbiz. Alǵash ret ótken jyly uıymdastyrylǵan jobanyń jeńimpazdary Elbasymen kezdesýge múmkindik alǵany belgili. Bıyl baıqaýǵa qatysýshylar sany bir jarym esege kóp. Sonyń ishinde aımaqtaǵy memlekettik organdardyń qyzmetkerleri belsene atsalysty. Qatysýshylar aldymen aımaqtyq irikteýden ótip, respýblıkalyq kezeńge joldama aldy. Uzyn sany 454 úmitkerdiń ishinen 390 adam tańdaldy. Biz olardy memlekettik qyzmetti qanshalyqty ıgergenin anyqtaıtyn test tapsyrmalary arqyly iriktep aldyq. Sonymen 50 baldan joǵary alǵandardan 189 adam kelesi kezeńge ótti. Solardyń ishinen fınalǵa 52 úmitker qatysty. Kezdesý qorytyndysy boıynsha respýblıkalyq komıssııa konkýrstyń 20 jeńimpazyn anyqtady. Olardyń 12-i basshylyq laýazymdarda, 8-i ózderiniń mansabyn endi bastaǵandar. Jeńimpazdardyń ishinde 12-si er adam, 8-i áıel adam. 20 jeńimpazdyń 9-y shet tilderinde erkin sóıleıdi, onyń ishinde 4-eýi «Bolashaq» baǵdarlamasynyń stıpendıattary. Eń kishisi 24 jasta, eń úlkeni 53 jasta», dedi Aıgúl Shaıymova.
Onyń aıtýynsha, jeńimpazdar osy aptanyń sońynda saltanatty jaǵdaıda marapattalmaq.
Raýan QAIDAR,
«Egemen Qazaqstan»
