«Túrkistan – er túriktiń besigi ǵoı» dep Maǵjan aqyn jyrlaǵandaı, bul tarıhı sheshimge barsha túrki halyqtary qýanyp, baýyrlas elderdiń buqaralyq aqparat quraldary aqjoltaı jańalyqty jarysa jazdy. Bul aqparatty TRT Avaz arnasy, Anadoly Agency agenttigi, Dünya Bülteni aqparat portaly súıinshi surap, alǵashqylardyń biri bolyp habarlady.
*****
Budan bólek, jeli qoldanýshylary da bir-birinen súıinshi surap, áleýmettik jelidegi paraqshalarynda jańalyqpen bólisti. Máselen, Chagdash Baıraktar esimdi azamat bylaı deıdi:
«Birneshe jyl buryn Nursultan Nazarbaev týraly jazýdy oılap júrgen edim. Ýaqyt óte berdi. Endi osy sheshimnen keıin ol kisi týraly jazýym mindetti. Ol óz mindetin adal atqaryp, qamqorlyq tanytady».
Songúl Berk esimdi azamat «Nursultan Nazarbaev búgin qol qoıdy. Budan bylaı Ońtústik Qazaqstan oblysy Túrkistan dep atalady. Túrki elderi men erleri, qutty bolsyn!», dep aǵynan jarylypty.
Taıfýn Tanjý Kara esimdi feısbýk qoldanýshysy oqıǵany ǵajaıyp oqıǵaǵa balap otyr. «Ońtústik Qazaqstan oblysy Túrkistan bolyp ózgerdi. Oblys ortalyǵy Túrkistan qalasyna kóshiriledi. Túp-tamyryna qurmet kórsetken qazaqtardy osynaý tarıhı sheshimmen quttyqtaımyn. Túrkistan myńdaǵan jyldar boıy túrki áleminiń rýhanı jáne saıası tiregi bolǵan edi. Myń jasa, Qazaqstan! Túrki halyqtarynyń baýyrlastyǵy máńgilik bolsyn», deıdi ol.
Osylaısha, baýyrlas elderdegi áleýmettik jeli qoldanýshylary aqjoltaı habardy jappaı bólisip, bir-birinen súıinshi surap jatyr.
Aıtpaqshy, osy oqıǵa qarsańynda Reseıdiń Regnum aqparat agenttigi budan bylaı ózderiniń saıttarynda Ortalyq Azııa aımaǵyn Túrkistan dep ataý jóninde sheshim qabyldapty. Bul týraly agenttiktiń bas redaktory Modest Kolerov málimdedi.
*****
«Regnum Ortalyq/Orta Azııa/Qazaqstan túsiniginen arylyp, Qazaqstan, О́zbekstan, Túrikmenstan, Tájikstan jáne Qyrǵyzstannyń dástúrli ataýy Túrkistandy qoldanady», delingen M.Kolerovtyń feısbýktegi paraqshasynda.
Ázirge basqa reseılik buqaralyq aqparat quraldary Regnum aqparat agenttiginiń bastamasyn qoldap, óńir ataýyn ózgertken joq. Áıtse de, keleshekte bul másele de óz sheshimin taýyp, Ortalyq Azııa óńiri tarıhı ataýyn qaıtaryp, Túrkistan atanyp jatsa nur ústine nur emes pe?!
Daıyndaǵan Abaı ASANKELDIULY,
«Egemen Qazaqstan»
