Memorandýmǵa Birikken Ulttar Uıymy Balalar qorynyń (IýNISEF) Qazaqstandaǵy ókili Iýrıı Oksamıtnyı jáne Tuńǵysh Prezıdent − Elbasy Qorynyń atqarýshy dırektorynyń orynbasary Sultan Aıtjanov qol qoıdy. Memorandýmǵa sáıkes eki tarap ta elimizdegi balalardyń quqyqtaryn qorǵaý maqsatynda qoǵam ishinde qajet aqparat berý salasynda tyǵyz jumys istemek.
Iýrıı Oksamıtnyı atap ótkendeı, balalyq shaq – adamnyń damýyndaǵy eń mańyzdy kezeń. Salamatty, tabysty jáne baqytty ómirdiń irgetasy qalanatyn kezeńde jas jetkinshekterdiń jalyndaǵan otty ıdeıalaryn el ıgiligine jarata bilýimiz qajet. «Bizdiń qor Qazaqstandaǵy ár balanyń densaýlyǵyna, tamaqtanýyna, qorǵanysyna jáne bilim alýyna quqyqtaryn júzege asyrý úshin qyzmet atqarady. Tuńǵysh Prezıdent – Elbasy qorymen tyǵyz qarym-qatynasymyzdyń arqasynda balalardy kishkentaı kezinen damytý, úlgili ata-ana bolý, jastar tárbıesi, ınklıýzıvti bilim berý máselelerine qoǵamnyń nazaryn aýdara alamyz degen senimdemin», deıdi Iý.Oksamıtnyı.
Al Sultan Aıtjanovtyń aıtýynsha qor balalar men jasóspirimderdiń ıntellektýaldy jáne shyǵarmashylyq áleýetin ashýǵa kómektesetin ártúrli jobalardy júzege asyryp keledi. Jas daryndardy qoldaý – jalpyulttyq mańyzy bar is-shara. Áleýmettik jobalar, sonyń ishinde balalar úıleri men ınternattarmen jyl saıyn belsendi jumys atqarylyp keledi. Sonymen qatar ınklıýzıvti bilim berý salasynda jumys isteýde. Respýblıkalyq balalar paralımpıadalyq starttary, «Meıirim» ınklıýzıvti balalar shyǵarmashylyǵy baıqaýy, «Aman keleshek» festıvali erekshe qajettilikteri bar balalardy qoǵamda áleýmettik beıimdeýge baǵyttalǵan.
«Budan buryn Tuńǵysh Prezıdent qory IýNISEF jáne basqa da uıymdarmen birlesip, balalar kúnine arnalǵan áleýmettik beınerolık jarııalaǵan bolatyn. Bolashaqta IýNISEF-pen birlesken jobalardy shyǵarmaq jáne áleýmettik naýqandardy qoldaýdy josparly túrde júzege asyryp otyrady», deıdi S.Aıtjanov.
Memorandýmǵa qol qoıylǵannan keıin «KazRoboProject-2018» 10-21 jas aralyǵyndaǵy balalar men jastar arasynda bilim berý robot tehnıkasy boıynsha respýblıkalyq ǵylymı-zertteý jáne shyǵarmashylyq jobalar baıqaýy ashyldy.
Baıqaý Qazaqstanda balalar men jasóspirimder arasynda bilim berý men sportty, robot tehnıkasyn damytýdy kózdeıdi. Is-sharanyń uıymdastyrýshylary alǵa qoıǵan mindetterge sáıkes, óńirlerdegi úzdik jobalardy anyqtaý jáne respýblıkalyq konkýrsqa qatysý úshin úzdik komandalardy qalyptastyrý, sondaı-aq daryndy mektep oqýshylaryna profıldik ýnıversıtetter men kompanııalardyń nazaryn aýdarý – basty baǵdar.
29 mamyr – 9 maýsym aralyǵynda elimizdiń 16 aımaǵynda baıqaýdyń irikteý kezeńderi ótip, oǵan 200-ge jýyq joba usynylǵan. Baıqaý eki jas kategorııasy boıynsha, ıaǵnı birinshi topta 10-15 jasar balalar, ekinshi topta 16-21 jas arasyndaǵy jetkinshekter ózara baq synasqan. Erkin taqyryptaǵy jobaǵa qatysýshylarǵa qoıylǵan basty shart – joba qoǵam úshin paıdaly bolýy tıis.
Aıta keteıik, baıqaýdy qazaqstandyq bilim berý jáne sporttyq robot tehnıkasy «Kazrobotıks» federasııasy uıymdastyrdy. Is-sharanyń bas seriktesi – QR Tuńǵysh Prezıdenti – Elbasynyń qory, sondaı-aq baıqaýdyń sheshýshi kezeńiniń resmı seriktesi «Infokommýnıkasııalyq tehnologııalardy damytý qory» ekenin aıta ketken jón.
Jalpy óńirler boıynsha irikteý kezeńderi barysynda «Nur Otan» partııasynyń «Jas Otan» jastar qanaty, «Qazposhta» AQ, «Zerde» ulttyq ınfokommýnıkasııa holdıngi» AQ, ««Astana EXPO-2017» ulttyq kompanııasy» AQ qoldaý kórsetti.
Mıras ASAN,
«Egemen Qazaqstan»
