Álem chempıonatynyń toptyq kezeńindegi Iran-Ispanııa matchy aldynda Tegerandaǵy «Azadı» stadıonyna arnaıy ekran qoıylyp, jankúıer qaýymnyń óz elin qoldaýyna múmkindik berildi. Stadıonǵa 10 myń adam jınalyp, fýtbol tamashalaǵan. Negizi mundaı sheshim Marokkoǵa qarsy oıyn aldynda qabyldanýy tıis bolatyn. Alaıda match bastalýyna birneshe saǵat qalǵanda bılik ashyq alańdardaǵy translıasııaǵa tyıym salǵan-dy.
Aıta keteıik, mundaı tyıym osyǵan deıin Saýd Arabııasynda da bolǵan. Biraq ótken jyldyń sońyna taman saýdııalyq bılik áıelderdiń stadıonnan matchtardy tamashalaýyna múmkindik beretin zań qabyldady.
Sonders 15 qyrkúıekte jekpe-jek ótkizedi
Orta salmaqta WBO tujyrymy boıynsha álem chempıony brıtanııalyq Bıllı Djo Sonders (26-0, 12 KO) ekinshi orta salmaq dárejesine kóterilip (76,2 kg), IBF beldigi bar Djeıms Dıgeılmen (24-2-1, 14 KO) jekpe-jek ótkizbek.
Bul týraly Sonderstiń promoýteri Frenk Ýorren aıtty. Onyń aıtýynsha, eger boksshylar aıqasqa kelise alsa, jekpe-jek 15 qyrkúıekte Londondaǵy O2 arenasynda ótedi. «Eger bári durys bolyp jatsa, Sonderske azdap salmaq qosý kerek bolady. Ýaqyttyń aldyna túskimiz kelmeıdi, biraq bizde birneshe nusqa bar. Degenmen kúzde úlken boks shoýyn ótkizýge tyrysyp, jankúıerlerge keremet boks keshin syılaýǵa barymyzdy salamyz», deıdi promoýter.
Sonders 23 maýsymda otandasy Martın Mıýrreımen (36-4-1, 17 KO) judyryqtasyp, WBO beldigin qorǵaýy qajet edi. Biraq Bıllıdiń jaraqatyna baılanysty jekpe-jek ótpeı qaldy.
Alǵashqy transfer – 49 mln eýro
Italııanyń «Napolı» klýbynyń jartylaı qorǵaýshysy Jorjıno jaqyn kúnderi «Manchester Sıtı» sapyna qosylady. Bul týraly Sky Sports tilshisi Fabrısıo Romano óziniń týıtter paraqshasynda málimdedi.
Sheteldik BAQ ókilderi taratqan aqparatqa qaraǵanda «qalalyqtar» 26 jastaǵy fýtbolshy úshin Italııa vıse-chempıonyna 49 mln eýro tóleıdi. Biraq bul soma birqatar bonýstardyń esebinen alynýy múmkin. Málimet ornyna aıta keteıik, Jorjıno ótken maýsymda «Napolı» klýby sapynda 39 matchqa shyǵyp, 4 gol soqqan.
Daıyndaǵan
Álı BITО́RE,
«Egemen Qazaqstan»
