Reseıdiń jeńisti jolyn Ýrýgvaı jalǵastyrdy. Álemniń eki dúrkin chempıony Ýrýgvaı Saýd Arabııasyn jeńip, kelesi kezeńge joldama aldy. Eki oıyndy da jeńgen ujymdar «V» tobynyń serkeleri Portýgalııa men Ispanııany kútedi. Olar da ózderiniń ekinshi oıyndarynda 3 upaıdan enshiledi. Deńgeıi joǵary fýtbolshylar Pıreneı túbeginiń aıaqdopty zor meńgergenin kórsetti. Bir gol soǵyp, qorǵanysty myqtap bekitken ekeýi pleı-offqa bir taban jaqyndady. Degenmen Ispanııa-Iran arasyndaǵy oıynda Parsy shyǵanaǵynyń sheberleri Pıreneı túbeginiń fýtbolshylarynan esh qaımyqpady. Tipti jaýapty goldy da soqty. Alaıda azııalyq oıynshylar tártip buzyp alypty. Áıtpegende, «qyzylbastar» eliniń aıaqdopshylary qorjyndaryna 1 upaı salyp qaıtar ma edi?
Ýrýgvaı bolsa kúshin aıap, bar yntasyn kórsetpedi. Saýdııalyqtar óz múmkindigin paıdalana almaı, birinshilikpen erte qoshtasty. Toptan shyǵatyn esh múmkindik qalmady. Mysyr, Saýd Arabııasy, Marokko komandalary toptyq kezeńnen ári óte almaıdy. Endi olar úshinshi matchtaryn tek abyroı úshin ǵana oınaıdy.
Reseı quramasyn jer-jebirine jetkizip synaǵan jergilikti baspasóz qazir orys oıynshylaryn qoldy-aıaqqa turǵyzbaı maqtap jatyr. «Golovın shyn talant», «bapkerimiz daryn ıesi» dep asyra maqtap ta jazdy. Chempıonat aldynda syn sadaǵyna ilip, quramalaryn qurdymǵa jiberip otyrǵan jazarmannyń endi bulaısha qubylýynyń syry nede? Fýtbol sarapshylary bul áreketti shamamen tuspaldap, «aldyn ala jasalǵan josparly shar-
ýa» dep baǵa berdi. Bul shamamen «ózimiz jasaǵan toıda, maqtaýly qyzdyń kúıin keshpeıik» degen qam-qareket sekildi kórinedi. Reseıdiń basty komandasy óz tobynan shyǵa almaǵan jaǵdaıda masqaranyń kókesi bolar edi. Endi bir synnan múdirmegen kórshilerimiz pleı-offtyń aýyr ótkelinen ótýdi kózdeıdi. Sebebi osy jetkenimizdiń ózi qaharmandyq dep, Portýgalııa nemese Ispanııaǵa qarsy oıynda «tıse terekke, tımese butaqqa» degeli otyr. Moıyndarynan aýyr júk túsken soń – al shaýyp kór. Reseılik oıynshylar shyn mánisinde qazir jasyl alańda shapqylap júr. Fýtboldy jik-jigimen taldaıtyn agenttikter saraptama berip, sandardy sóıletti. Reseı oıynshysy Aleksandr Golovın osy chempıonatta ázirge eń kóp júgirgen fýtbolshy. Ol Saýd Arabııasyna qarsy ótken oıynda 12 shaqyrymnan astam qashyqtyqqa júgirip tastapty. О́zge quramalardan qarar bolsaq, bul tizimnen Krıstıan Erıksendi kózimiz shalady. Dat fýtbolshysy alańda 12 shaqyrymǵa jeteqabyl júgiripti.
Halyqaralyq fýtbol toılarynda atoı salyp úırenip qalǵan Krıshtıaný Ronaldý da taǵy bir rekord jańartty. Ol 12 iri jarysta gol soqqan fýtbolshy. Marokko qaqpasyna baspen gol soqqan ataqty oıynshy qazir birinshiliktiń basty surmergeni. Onyń enshisinde 4 gol. Bul jaǵdaıdan Ispanııa shabýylshysy Dıego Kosta Iran qaqpasyna dop soǵyp qalysar emes. Tegi brazılııalyq bolǵanymen, júregi Ispanııa dep soǵatyn adýyndy shabýylshynyń esebinde 3 gol bar. Shamasy, ekeýiniń teketiresi uzaqqa sozylady-aý.
Sońǵy kúnderi fýtbol toıynda japonııalyqtar jaıly kóp aıtyldy. Japonııa-Kolýmbııa arasyndaǵy oıyndy Kúnshyǵys elinde búkil halyqtyń 63,79 paıyzy kóripti. Odan bólek te elderdiń jalpylama reıtıngin eseptegende bul matchty 36,62 mıllıon adam tamashalaǵan. Bul ázirge Álem chempıonatyndaǵy eń joǵarǵy kórsetkish. Árıne eger Japonııanyń ornynda Qytaı nemese Úndistan oınaǵanda reıtıng odan da joǵary bolar ma edi? Sebebi óz qurama komandasynyń oıynyn ár memleket túgelimen tamashalaýǵa tyrysýda. Fýtbolmen tynystaıtyn Brazılııa bıligi tipti Neımarlar jasyl alańǵa shyǵatyn kúndi demalys etip jarııalap, keıbir aýdandary jumys kúnin qysqartyp tastady.
Ermuhamed MÁÝLEN,
«Egemen Qazaqstan»
