Bokstan jastar arasyndaǵy álem birinshiligine 9 qazaqstandyq qatysady

Jastar býyny arasyndaǵy jarys­tardyń talaıynda Qazaq­stan­­nyń órenderi jasyn­daı jar­qyrap, tolaǵaı tabys­tar­ǵa qol jetkizdi. Búgingi tańda mem­le­ketimizdiń maqtanyshyna aınalyp otyrǵan gúrzi judyryqty ji­­git­terimizdiń deni dál osy bá­se­­kelerde ysylyp, ár jyldary jeńis tuǵyryna kóterildi. Alys­qa barmaı-aq, sońǵy bes álem birinshiliginiń nátıjelerine zer salsaq ta jetkilikti degen oıda­myz. Máselen, 2008 jyly Mehı­koda uıymdastyrylǵan ja­rys­ta Danııar Eleýsinov (60 kılo) pen Ivan Dychko (91 kılo) kú­mis me­daldi moıyndaryn­da jar­qy­ratty. Danııar ırlan­dııa­lyq Reı Moıletke, al Ivan kýba­lyq Erıs­landı Savonǵa utyl­dy. Eki re­tinde de báseke taǵdyryn eki upaı ǵana sheshken edi. 

2010 jáne 2012 jyldary Baký men Erevanda ótken jarys­tyń nátıjesine kóńilimiz tolma­dy. Ázerbaıjanda birde-bir boksshymyz júldegerler sanatyna qosyla almasa, Armenııada Dáýlet Baıǵabatovtyń (75 kılo) jalǵyz qola medalin qanaǵat tutýǵa týra keldi. 

Esesine 2014 jyly Bolgarııa­nyń bas shahary Sofııada tórt jer­lesimiz aqtyq synda aıqasyp, tórtkúl dúnıe jankúıerleriniń nazaryn ózderine aýdardy. Atap aıtsaq, qarsy kelgenderdiń bar­lyǵyn qoǵadaı japyrǵan Shal­qar Aqshabaı (49 kılo) men Abylaıhan Júsipov (60 kılo) al­­tyn tuǵyrdan qol bulǵady. Fınalda Shalqar ózbekstandyq Sýleıman Latıpovti jeńse, Aby­laıhan rýmynııalyq Arsen Mustafadan aılasyn asyrdy. Sheshýshi sátte ǵana utylǵan Sultan Záýirbek (56 kılo) pen Vla­dımır Kazakov (81 kılo) kúmis júldege qol jetkizdi. Osy kórsetkishtiń arqasynda Qazaq­stannyń jastar quramasy óz tarıhynda tuńǵysh ret álem birinshiliginiń jalpy esebinde bas júldeni oljalady. 

2016 jylǵy dodany Reseıdiń Sankt-Peterbýrg qalasy qabyl­da­dy. Neva jaǵalaýynda asqan sheberlik tanytqan Sadrıddın Ahmedov (69 kılo) bas júldeni qan­jyǵasyna baılady. Fınalda ol ýkraınalyq Pavel Gýlaǵa adym ashtyrǵan joq. Aqtyq aıqas­ta qarsylastaryna bir ǵana upaı aıyrmashylyǵymen ese jibergen Samatáli Tóltaev (56 kılo) pen Bek Nurmaǵambet (75 kılo) kúmis medaldi moıyndarynda jarqyratty. Al Bekzat Nurdáýletov (81 kılo) qo­laǵa qol sozdy. Jarystyń jal­py esebinde Kýba men AQSh qura­malaryn ǵana alǵa jibergen Qazaqstannyń bylǵary qolǵap sheberleri úshinshi orynǵa turaqtady. 

Mine, endi bizdi Býdapeshtegi álem birinshiligi kútip tur. Bul jarysta kimderdiń baq synaıtynyn joǵaryda aıttyq. Bul jigitterdiń barlyǵynyń da túrli ha­lyqaralyq dodalarda júlde alyp júrgenin jankúıerler jaq­sy biledi. Onyń ústine ústi­miz­degi jyldyń sáýir aıynda Bangkokta jalaýy jelbiregen Azııa birinshiliginde 6 altyn, 1 kú­mis jáne 1 qola medaldi ıelengen otandastarymyz komandalyq esep­te bas júldeni oljalaǵan edi. En­di álemdik dodada da ózimizdiń myqtylyǵymyzdy dáleldeýge tıispiz. 

Ǵalym SÚLEIMEN,
«Egemen Qazaqstan»

ALMATY