Is-sharaǵa Parlament depýtattary, qoǵam qaıratkerleri, úkimettik emes uıym ókilderi, partııa Ortalyq apparatynyń qyzmetkerleri jáne beınekonferens baılanysy arqyly oblys ákimderiniń orynbasarlary men partııa óńirlik fılıaldarynyń basshylyǵy qatysty.
Otyrysty ashqan Máýlen Áshimbaev Elbasy, partııa Tóraǵasynyń tapsyrmasy boıynsha «Nur Otan» partııasynyń qoǵamnyń túrli salasynda sybaılas jemqorlyqqa qarsy maqsatty ári júıeli jumys júrgizip kele jatqanyn aıtty. Bul baǵytta partııanyń Sybaılas jemqorlyqqa qarsy is-qımyldyń 2015-2025 jyldarǵa arnalǵan baǵdarlamasy basty qujat bolyp tabylady. Sondaı-aq «Nur Otannyń» osy máselemen aınalysatyn basty qurylymy retinde Sybaılas jemqorlyqqa qarsy respýblıkalyq qoǵamdyq keńes jumys isteıdi. Mundaı keńester barlyq oblystar men aýdandarda qurylǵan. Odan bólek, partııanyń Májilistegi fraksııasynyń depýtattary da atalǵan salada aýqymdy jumystar atqarýda. Osy máselelerge toqtalyp ótken M.Áshimbaev aldaǵy ýaqytta bul jumystardyń odan ári jandana túsetinin jetkizdi.
– Búgingi memorandým partııa men agenttik arasyndaǵy sybaılas jemqorlyqqa qarsy is-qımyldyń jańa kezeńine jol ashady dep senemiz. «Nur Otan» aldaǵy ýaqytta osy salada basqa da memlekettik organdarmen tyǵyz jumys isteýge daıyn. О́ıtkeni partııanyń basty mıssııasy – Elbasynyń senimdi tiregi bolýymen qatar Qazaqstandy jańǵyrtýǵa júıeli qatysatyn strategııalyq kúshke aınalý, – dedi Máýlen Áshimbaev.
Partııa Tóraǵasynyń birinshi orynbasary memorandýmda kórsetilgen talap, mindetterdi maqsatty túrde oryndaýǵa qatysty birqatar basymdyqtardy atap ótip, aldymen Prezıdenttiń bes áleýmettik bastamasynyń júzege asyrylýyn baqylaý jumystaryna nazar aýdardy. Elbasy tapsyrmasyna oraı bes bastamanyń júzege asyrylýyn baqylaý maqsatynda partııanyń muryndyq bolýymen Qoǵamdyq keńes qurylǵan bolatyn. Sonyń nátıjesinde partııa osy baǵyttaǵy jumystarǵa monıtorıng júrgizip, anyqtalǵan olqylyqtardy jan-jaqty qarastyryp, sybaılas jemqorlyqqa qatysty tustaryn agenttikpen birlesip sheshetin bolady. Máýlen Áshimbaev bul jumysqa úkimettik emes uıymdardyń da belsene qatysýy kerektigin aıtty.
– Ekinshiden, búginde partııa sybaılas jemqorlyqtyń aldyn alyp, osy saladaǵy kóleńkeli tustardy joıýǵa baǵyttalǵan birqatar partııalyq jobalardy qolǵa aldy. Úshinshiden, sybaılas jemqorlyqty múldem boldyrmaý úshin memlekettik organdar men ulttyq kompanııalardyń aqparattarǵa qoljetimdiligin qamtamasyz etýge erekshe kóńil bólinbek. Tórtinshiden, kúresti kúsheıtý úshin partııanyń barlyq resýrsyn jumyldyratyn bolamyz. Qoǵamdyq qabyldaýǵa kelgen halyq osy máselege qatysty qandaı da bir aqparat, usynys berse, ony taldap, qajet jaǵdaıda agenttikke joldaımyz. Besinshiden, partııa men úkimettik emes uıymdar arasyndaǵy jumysty jandandyrýǵa tyń serpin beriledi, – dedi Máýlen Áshimbaev.
Sonymen qatar jıyn barysynda 2017 jyly túrli sebeptermen 276 adamnyń partııa qatarynan shyǵarylǵany aıtyldy. Olardyń 171-i sybaılas jemqorlyqqa qatysty is-áreketi úshin shyǵarylǵan. Partııa Tóraǵasynyń birinshi orynbasary mundaı jaıttardy múldem boldyrmaý úshin aldaǵy ýaqytta nurotandyqtardyń sapasyna erekshe mán beriletinin basa aıtty.
– Endi biz partııa músheleriniń sanyna emes sapasyna kóp kóńil bóletin bolamyz. Qandaı da bir sybaılas jemqorlyqqa qatysy bar, qyzmetin óziniń jeke maqsatyna paıdalanǵysy keletin adamǵa partııada oryn joq. Eger biz jemqorlyqpen kúreske belsene qatysqymyz kelse, aldymen óz qatarymyzdyń tazalyǵyn qamtamasyz etip alýymyz kerek, – dedi Máýlen Áshimbaev.
О́z kezeginde Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev sybaılas jemqorlyqpen kúres tek memleketke ǵana emes, bul búkil azamattyq qoǵamǵa ortaq másele ekenin aıtty. «Nur Otan» partııasynyń bul salaǵa kóńil bólip, joǵary deńgeıde talqylaýy quptarlyq is, – dedi Alık Shpekbaev.Onyń sózine qaraǵanda, elektrondy úkimet pen kásibı, strategııalyq memlekettik apparattyń qurylýy bul saladaǵy baqylaý jumystaryna oń septigin tıgizýde. «Endigi saty – ınnovasııalyq memlekettik apparatqa kóshý. Bul baǵytta aýqymdy jumystar atqarylýda», – deıdi agenttik tóraǵasy.
Osy rette aıta keter jaıt, partııa men Agenttik arasyndaǵy memorandýmnyń basty maqsaty – elimizdiń sybaılas jemqorlyqqa qarsy saıasatyn oryndaýǵa baǵyttalǵan birlesken jáne kelisilgen is-qımyldy daıarlap, júzege asyrý, osy baǵyttaǵy qolǵa alynǵan sharalardyń tıimdiligin arttyrý, jemqorlyqtyń sebep-saldaryn joıý jáne onyń aldyn alý.
Sonymen qatar kúsh biriktirý arqyly qoǵamda jemqorlyqqa qarsy mádenıet qalyptastyryp, quqyqtyq saýattylyqty arttyrý, eńbekke adaldyq pen jemqorlyqqa tózimsizdikti keńinen nasıhattaý, sybaılas jemqorlyqqa qarsy tárbıe jáne óskeleń urpaq pen jastardyń bul saladaǵy bilimin tereńdetý sııaqty basym baǵyttar júzege asyrylatyn bolady.
Joldybaı BAZAR,
«Egemen Qazaqstan»
