Qaz-qatar tigilgen qazaqy naqyshtaǵy aqshańqan úıler sharanyń shyraıyn ashyp, aýyzdyǵymen alysqan arǵymaqtar rýh merekesiniń ajaryn arttyra tústi. Bir boıyna san ónerdi qatar toǵystyrǵan óreli ónerpazdar jıylǵan jurtty kóshpeliler álemimen qaýyshtyryp, uly dalanyń rýhyn aspandatty. Bilegi qýatty jigitter balýandyq ónerdiń sıqyrymen baýrasa, júregi shýaqty óner maıtalmandary jyrdan shashý shashyp, salqar dalany ásem sazymen terbedi. Olardyń sapynda Majarstandyq Gabrıella Kısh jáne Zoltan Shoıomfı-Nagı-shaman, baýyrlas qyrǵyz eliniń ataqty etno ánshisi Nurzat Aıdarqulova, kómeımen án aıtýdyń has sheberi Altaılyq Irına Kenzına, Býrattar eliniń atynan kelgen reseıdiń eńbek sińirgen ártisteri Sergeı Aıýsheev pen Oleg Býlýtov, «Baıkal» memlekettik ulttyq án jáne bı teatry, «Serge» ansambl, sondaı-aq «Ulytaý», «Alashuly», «Hassaq», «Turan», «Tıgrahaýd», «Sazgen sazy», «Sarmad», «Babalar sazy» tárizdi otandyq óner ujymdaryn erekshe ataýǵa bolady.
Ulttyq qundylyqtarymyzdyń dińgegi sanalatyn kókpar, aýdaryspaq, qyz qýý, asaýǵa tusaý salý, báıge at dese delebesi qozatyn aǵaıyndy arqalandyrsa, qusbegiler men saıatshylar aımaǵynda uıymdastyrylǵan búrkit, ıtelgi ushyrý, qumaı tazyny ańǵa salý sııaqty ulttyq oıyndar kórermendi tánti etti. Temirden túıin túıgen zergerler men ismerler shep qurǵan sheberler aımaǵynda jún sabaý, urshyq ıirý, kıiz, tekemet basý, keste toqý, qysh qumyra jasaýdyń qyr-syryna qanyqtyratyn arnaıy sheberlik sabaqtary ótkizildi. Festıval qonaqtary shoqqa pisken taba nan, qazan qarma, balqýyrdaq, naryn, búlkeqaryn, úlpershek, jaýjúrek, balqaımaq tárizdi til úıiretin túrli taǵamdardan dám tatyp, umytylyp bara jatqan ulttyq as mázirleri qaıta jańǵyrdy.
«Basty maqsat – qazaqstandyqtar men shet eldik qonaqtarǵa kóshpendiler mádenıetin, qazaqtyń ejelgi tarıhy men salt-dástúrin kórsetý» – deıdi sharany uıymdastyrýshylar. Jyldaǵy dástúr boıynsha dýmandy merekeni kez-kelgen turǵynnyń tegin baryp tamashalaýyna tolyqtaı múmkindik jasaldy. Qaladaǵy Ortalyq stadıon men «Astana» alańynan, «Saıahat» avtobeketi men «Alataý» dástúrli óner teatry mańynan ár jarty saǵat saıyn arnaıy avtobýstar qatynap, Almatylyqtar men qala qonaqtaryn kóshpendiler murasymen qaýyshtyrdy. Osylaısha etnofestıvalǵa kelgender kóshpendilerdiń kóne tarıhynan syr shertip, turmys-saltynan habar beretin ózindik erekshelikterin kózben kórip qana qoımaı kóńilge túıip qaıtty. Muny sheteldik meımandardyń ystyq yqylasynan baıqadyq. Ulttyq qundylyqtardyń qaınarynan qanyp iship, ejelgi Turan órkenıeti men kóne Túrkiler tarıhyna saıahat jasaýǵa kelgender qazaq dalasynyń keńdigine, balasynyń órligine taǵy da bir bas ıdi.
Arman OKTIаBR,
«Egemen Qazaqstan»
ALMATY
