Azamattardyń quqyqtary men bostandyqtaryn qorǵaýdan bastap, quqyq qorǵaý, tótenshe jaǵdaılardyń aldyn alý jáne saldaryn joıý, túzetý mekemelerin basqarý tárizdi jáne basqa da eń ózekti salalardyń basyn biriktirip otyrǵan mınıstrliktiń aldyna qoıylǵan mindet te aýqymdy. Osydan 26 jyl buryn 23 maýsymda qurylǵan qurylym búginde elimizdegi eń iri mınıstrlik bolyp otyr.
Resmı derekterge qaraǵanda, táýelsizdik jyldarynda ishki ister organdarynyń 850 qyzmetkeri qyzmettik mindetterin óteý kezinde, qylmyskerdi ustaý kezinde qaza tapqan. Sonymen qatar qyzmettik mindetterin óteý kezinde polısııanyń 2320 qyzmetkeri jaraqat alǵan.
Shara qyzmettik boryshyn óteý kezinde qaza tapqan áriptesterdi bir mınýt únsiz eske alýmen bastaldy.
Sondaı-aq monýment aldynda Ishki ister mınıstrliginiń joǵary oqý oryndaryn úzdik támamdaǵan túlekterge – leıtenant pogondaryn tabystaý rásimi de ótti. Qalmuhanbet Qasymovtyń qolynan alǵashqy shenin alǵandardyń biri – Nargız Jaqsylyqova IIM B.Beısenov atyndaǵy Qaraǵandy akademııasynyń túlegi.
– Men bul salany bekerden-beker tańdaǵan joqpyn. Mektepte oqyp júrgenimde týǵan aýylymda aýyr qylmys tirkelip, ol ashylmaı qaldy. Al qylmyskerdiń qolynan qaza tapqan kelinshektiń qyzyn jaqsy tanıtynmyn. Osy jaǵdaı maǵan qatty áser etti. Qurbymnyń kúızelisin kórip, mektep bitirgen soń polısııa qyzmetkeri bolýdy oıladym. Sóıtip elimizde quqyqtyq tártiptiń saqtalýyna, qylmystardy boldyrmaýǵa kúsh salǵym keldi. Mine, bul armanyma da jettim, – deıdi jas leıtenant.
Nargız búginde jumysqa ornalasyp ta úlgergen. Ol Shyǵys Qazaqstan oblystyq ishki ister basqarmasyna qarasty Ertis polısııa bóliminde tergeýshi bolyp qyzmet etýde.
Jalpy, bıyl IIM joǵary oqý oryndaryn támamdaǵan 1070 túlek leıtenant shenin alyp, túgeldeı jumysqa ornalastyrylǵan.
Is-sharadan soń Ishki ister mınıstri Qalmuhanbet Qasymov mınıstrliktiń klýbynda áriptesterin kásibı merekelerimen quttyqtap, qyzmetterin adal oryndaýda kózge túsken birqatar polıseılerdi saltanatty jaǵdaıda marapattap, izgi tilekterin jetkizdi. Bıyl ishki ister salasynda aýqymdy reformalardyń taǵy bir legi bastalatyndyǵyn jetkizdi jáne aldaǵy qurylymdyq ózgerister jaıynda baıan etti.
Osy kúni ortalyq apparattyń jáne aýmaqtyq bólinisterdiń 854 qyzmetkeri qyzmettik mindetterin adal oryndaǵany úshin marapattaldy.
Kesh sońynda jınalǵandar nazaryna Almaty qalasy IID men Ulttyq ulan kórkemónerpazdary daıarlaǵan merekelik konsert usynyldy.
Serik ÁBDIBEK,
«Egemen Qazaqstan»
