Elbasy Nursultan Nazarbaev osy máselege erekshe nazar aýdaryp, Astana qalasynyń aınalasyn jasyl jelekke aınaldyrý týraly bastamany qolǵa aldy. Bul negizinen Aqmola oblysyndaǵy kórshiles Býrabaı men Zerendini týrıstik klasterge aınaldyrý aıasynda júzege asyrylýda.
Osyndaı mańyzdy jobalar qolǵa alynyp jatsa da, Býrabaı men Zerendiniń ormanyn zańsyz otaý azaıatyn emes. Bir kóshetti otyrǵyzyp, ósirý úshin ondaǵan jyl qajet. Biraq ormanǵa jaýlyqpen qaraıtyndar muny nazarǵa da almaıdy. О́ıtkeni olarǵa aǵash kesý quqyǵyn berip otyrǵan da – ormandy qorǵaýǵa tıisti memlekettik organdar. Bizdińshe bul qaskúnemdikti dereý toqtatý kerek. Abylaı hannyń aq ordasy bolǵan kıeli Býrabaıdyń aǵashyn zańsyz kesip, bir túp kóshet otyrǵyzbaý – ulttyq úlken qasiret. Býrabaıdyń sulý tabıǵaty bizdiń kóz aldymyzda joıylyp barady.
О́tken jyldyń ózinde Aqmola oblysynda 110 zańsyz aǵash kesý faktisi tirkelip, jalpy aýmaǵy otyz myńdaı sharshy metrdiń aǵashy zańsyz otalǵany anyqtalǵan.
Jaqynda «Aq jol» QDP Májilistegi fraksııasyna Zerendi aýdany, Qanaı bı aýylynyń 75 turǵyny qol qoıǵan hat kelip tústi. Onda «Kishi Túkti» orman sharýashylyǵynyń toǵyz myńdaı gektar orman qory «Jasyl aǵash» seriktestigine aǵash kesip, daıyndaý úshin 49 jylǵa paıdalanýǵa zańsyz berilgeni týraly dabyl kóterilgen. Jergilikti turǵyndarmen eshqandaı qoǵamdyq tyńdaý ótkizilmegen.
Dál osyndaı oqıǵa Býrabaı aýdanyna qarasty Qarabulaq aýylynda da oryn alyp otyr. Kesilgen aǵashtyń ornyna jas kóshetter otyrǵyzý baǵytynda da jumystar joq deýge bolady. Aǵashty bulaı otaı bersek, barlyq jasyl baılyǵymyzdan aıyrylyp qalamyz. Elimizde týrıstik klasterdi júzege asyrý bastamasyna da balta shabylýy múmkin. Biz osy máselelerdi Premer-Mınıstrdiń orynbasary – Aýyl sharýashylyǵy mınıstri О́mirzaq Shókeevtiń nazaryna jetkizip, tıisti shara qoldanýdy ótindik.
Merýert QAZBEKOVA,
Májilis depýtaty
