Túrkistannyń tarıh tegershiginde jańa bir beleske, dálirek aıtsaq óz arnasyna qaıta oralýy, qaıtadan ultty uıystyratyn aımaqqa aınalǵany, oblystyq dárejege kóterilip, keleshekte túrki áleminiń, tipti shyǵys halyqtarynyń mádenıeti men óneriniń qaıtadan órken jaıyp, qaınar bulaǵyna aınalatyny mártebesi bıik bolǵan ólkeniń qýaty men áleýetiniń qanshalyqty mol ekenin tanytyp otyr.
Túrkistannan halqymyz Áziret Sultan dep qurmet tutatyn Qoja Ahmet Iаsaýıge mavzoleı ornatyp, ata-babamyzdyń mádenı aǵynyn bir arnaǵa túsirip, keleshektegi qazaqtyń Altyn qazyǵy etip belgileýin biz búgingi táýelsizdigimizdiń senimdi dińi dep baǵalaımyz. Qoja Ahmet Iаsaýı – ózine deıingi damyp kelgen myńjyldyqtar mádenıetin bir boıyna jıyp, keler urpaqqa mádenıet pen ónerdiń san salaly bastaý tumalaryn ashyp ketken birtýar tulǵa. Ol tumalar – qazaqtyń taýsylmas qasıetti dili.
Elbasynyń Astanany elimizdiń júregi, memleketimizdiń tiregi etip qalyptastyrýdaǵy árbir qadamy Qazaqstannyń baıandy bolashaǵynyń kepiline aınaldy.
Bul oraıda elordamyz Astananyń 20 jyldyq mereıtoıynda Túrkistannyń jańa oblystyq ordaǵa aınalýy – tarıhta altyn áriptermen jazylatyn erekshe tarıhı sheshim boldy!
Túrkistan oblysyn qurý boıynsha qabyldaǵan Elbasynyń Jarlyǵy sanamyzǵa serpilis berip, ózimizdiń rýhanı álemimizde únsiz jádigerge aınalyp bara jatqan tarıhı-mádenı muralarymyz ben ónerimizdiń káýsarymen sýa-
ryp, dilimizdi oıatty. «Rýhanı jańǵyrý» baǵdarlamasynyń taǵy bir tamasha tabysy – Túrkistannyń oblys ortalyǵyna aınalýy boldy.
Qaı qazaqtan surasańyz da, onyń ata-babasy, mindetti túrde, Qoja Ahmet Iаsaýıdiń mazaryna baryp táý etken, bilim alǵan, sol rýhanı káýsardan qanyp sý ishken qasıetti adam bolyp shyǵady. Bul aqıqatty aýyzsha jón surasýdyń ǵana enshisine berip qoımaı, ár qazaq úshin Túrkistan qasıetti bolatyn qaıta jańǵyrǵan tarıh aqparatyna aınalýy tıis. Túrkistanǵa barmaǵan qazaqtyń bolashaqta da bolmaıtynyn kózdep, mádenıettiń qalyptasqan ordasynan bata alýyn tamasha týrıstik jolmen uıymdastyrýymyz kerek.
Endigi bizdiń mindet – «Tuma kórseń, kózin ash» dep, ata-babamyz qaǵıda etip ketken rýhanı bulaqtardyń kózin ashý.
Qazaqstannyń árbir aımaǵy, árbir jer-sýy, tipti topyraǵynyń árbir qıyrshyǵy – tarıhta Jer betine órkenıettiń sáýlesin taratqan adamdardyń basyp ótken izderin «tańbalap» qalǵan, árqaısysy mańdaıǵa tıgizip táý eterlik qasıetti jádiger. Túrkistannyń, osynaý sakraldy, qasterli de qasıetti aımaqtyń óz aldyna memlekettik deńgeıde úlken dáreje alýy – qazaqtyń ǵana emes, ıisi bir túrki jurtynyń, tipti kórshiles shyǵys elderiniń de basyn ıdirgen alyp tulǵalardyń týǵan jerine degen erekshe qurmetimiz bolyp tabylady.
Sol tulǵalardyń izin tiriltý arqyly jańa urpaq qazaq mádenıetiniń zaıyrlylyǵyn, izgiligin, tarıhı sabaqtastyǵyn, onyń jalpyadamzattyq órkenıetpen baılanysyn, múmkin, besigi bolǵanyn dáleldeıtin ózderiniń ómirdegi ıgi joldaryn qalyptastyra alady.
1500 jyldan astam tarıhy bar, Qazaq handyǵynyń astanasy bolǵan, shartarapqa ketken kerýen joldarynyń toǵysqan jeri, Uly Jibek jolynyń ortalyǵyna aınalǵan Túrkistan qalasy týraly Elbasy N.Á.Nazarbaev: «Árbir halyq, árbir táýelsiz memleket óziniń rýhanı ortalyǵyn naqtylap alýy kerek. Qazaqstannyń rýhanı ortalyǵy Túrkistan», – dep baǵa bergen bolatyn.
Elimizdiń rýhanı órkenıetti ortalyǵy bolýyna birlesip atsalysý kóptiń aldyndaǵy mindet.
Qýatjan ÝÁLIEV,
Qazaqstan Respýblıkasy
Mádenıet jáne sport mınıstrliginiń jaýapty hatshysy
