Ekspedısııa músheleri áýeli Semeı qalasyndaǵy Qazaq ınnovasııalyq-gýmanıtarlyq zań ýnıversıtetinde Qazaqstan Respýblıkasy Prezıdenti janyndaǵy «Rýhanı jańǵyrý» baǵdarlamasyn iske asyrý jónindegi Ulttyq komıssııanyń Ortalyq saraptama keńesiniń kóshpeli májilisine qatysty.
Saraptama keńesiniń kóshpeli májilisi óńirlik jobalaý keńseleri men sarapshylar qaýymdastyǵy arasyndaǵy ózara baılanysty jaqsartýǵa, Shyǵys Qazaqstan oblysynda baǵdarlama aıasynda iske asyrylatyn jobalardyń sapasyn arttyrý boıynsha usynystardy talqylaýǵa, sonymen qatar ólketaný boıynsha oqýlyqtar ázirleý, baspadan shyǵarý, materıaldyq jáne materıaldyq emes mádenı eskertkishter reestrin qalyptastyrý tájirıbesin qoldanysqa engizýge baǵyttaldy.
Kóshpeli májiliske EUÝ prorektorlary Dıhan Qamzabekuly, Serikjan Qanaev pen Eltańba avtory Jandarbek Málibekov, ánshi, professor Kenjeǵalı Myrjyqbaı, taǵy basqa sarapshy-ǵalymdar, óńirdiń ǵylymı-pedagogıkalyq qaýymy qatysty.
Jıynda Shyǵys Qazaqstan oblysy ishki saıasat basqarmasynyń basshysy Nellı Krasnobaeva óńirde «Rýhanı jańǵyrý» baǵdarlamasynyń oryndalý barysy týraly baıandady.
Jıynǵa qatysqan zııaly qaýym «Qazaqstannyń kıeli oryndarynyń geografııasy» respýblıkalyq jáne óńirlik jobalary týraly qundy oılarymen bólisti.
Baıandamalardy talqylaý barysynda sarapshylar sapaly jobalardy irikteý boıynsha birneshe usynystar men usynymdar berdi. Olardyń ishinde belgili ǵalym Arap Espenbetov Abaıdyń ákesi Qunanbaıdyń esimi «Qazaqstannyń kıeli oryndarynyń geografııasy» respýblıkalyq jáne óńirlik jobalarynyń tizimine engizilmeı qalǵanyn qynjyla aıtty. Sondaı-aq «Rýhanı jańǵyrý» ǵylymı-zertteý ınstıtýtynyń dırektory Erlan Aryn, EUÝ ǵalymdary Serikzat Dúısenǵazy men Erlan Saılaýbaı aıtqan qundy oılar men mańyzdy máseleler de kópshiliktiń kóńilinen shyqty.
Kóshpeli májilis aıasynda Eltańba avtory Jandarbek Málibekov sóz alyp, Qazaq ınnovasııalyq-gýmanıtarlyq zań ýnıversıtetiniń rektory Shyryn Qurmanbaevaǵa Eltańbanyń jańa nusqasyn tabys etti.
Sapar ári qaraı jalǵasyp, astanalyq meımandardy Jarma aýdanynyń ákimi Nurlan Sydyqov qarsy alyp, aýdanǵa at basyn burǵan Eltańba avtory Jandarbek Málibekovke qazaqı dástúrmen tartý-taralǵy jasady. Ári qaraı saparyn jalǵastyrǵan top Jarmadan keıin Aqsýat aýdanyndaǵy jańadan salynǵan «Yrǵyzbaı áýlıe» keshenine burylyp, áýeli Quran baǵyshtap, áýlıe týraly kitaptyń tusaýkeser rásimine qatysty.
Kitapta Yrǵyzbaı Doshanaulynyń ǵumyry men zamany týraly tarıhı derekter qalyptasqan kanondyq zertteýlerden ózgeshe, ıaǵnı jańasha sıpatta berilgen. Áýlıe zamany týraly saralanǵan túıindi oı-tujyrymdar tyń ári qyzyqty jáne tııanaqty dálelderimen tartymdy.
Sondaı-aq Aqsýat aýylynda «Qazaq kúresinen» Yrǵyzbaı Doshanauly atyndaǵy VI halyqaralyq týrnır jáne Tarbaǵataı aýdanynyń ortalyǵynda aqyndar aıtysy ótti.
Bazarbek TÚKIBAI,
Qazaqstan Jazýshylar odaǵynyń múshesi
ASTANA – SEMEI – QALBATAÝ – AQSÝAT
