Máselen, zeınetaqy júıesine qatysý ótili bazalyq zeınetaqyny belgileý úshin qabyldanǵan 1998 j. 1 qańtarǵa deıingi eńbek ótili eskeriletin bolady. Oǵan joǵary oqý oryndarynda oqyǵan ýaqyty, áskerı boryshyn ótegen ýaqyty, kásipkerlik qyzmet t.s.s. kiredi.
Ekinshiden, mindetti zeınetaqy jarnalary aýdarylǵan ýaqyt kezeńi eskeriledi. Sonymen qatar oǵan 3 jasqa deıingi balany (jalpy ýaqyty 12 jyl) jáne múgedek balalardy 16 jasqa deıin kútip-baǵý, kúsh qurylymdary qyzmetkerleri bolyp tabylatyn erli-zaıyptylardyń olardyń eńbekke ornalasý múmkindikteri bolmaǵan jerlerde turý kezeńi, QR dıplomattyq qyzmetterindegi, halyqaralyq uıymdardaǵy erli-zaıyptylardyń shetelderde turý kezeńderi eskeriledi.
Budan ózge, I toptaǵy múgedekterdi baǵyp-qaǵý, basqanyń kómegine muqtaj II toptaǵy jalǵyz múgedekter men jasy boıynsha zeınetkerlerdi baǵyp-kútý, sonymen qatar 80 jastan asqan egde adamdardy kútý jáne t.b. ýaqyty eskeriledi.
Eńbek jáne halyqty áleýmettik qorǵaý mınıstrliginiń málimetteri boıynsha, bazalyq zeınetaqynyń ortasha mólsheri 25 456 teńge bolady dep kútilýde. Bul oraıda, zeınetkerlerdiń 44% nemese 947 myń eń kóp mólsherdegi zeınetaqyny alatyn bolady, al taǵy 956 myń adam (44,5%) 20 930 teńgeden 28 284 teńgege deıin alady (KM 74%-nan 100% deıin).
Eńbek jáne halyqty áleýmettik qorǵaý vıse-mınıstri S. Jaqypova qaıta eseptelgen bazalyq zeınetaqy máselesi boıynsha júginetin azamattar úshin bazalyq zeınetaqyny eseptegen kezde eskerilgen zeınetaqy júıesine qatysý ótili týraly jan-jaqty málimetterdi qamtıtyn jeke anyqtama formasy qarastyrylǵanyn aıtty.
«Zeınetkerlerge eshqaıda barýdyń qajeti joq, bizde bazalyq zeınetaqyny qaıta esepteýdi júzege asyratyn barlyq derekter bar. Qaıta esepteý qosymsha qujattardy usynýsyz oryndalady, sebebi zeınetkerlik isterinde eńbek ótili týraly málimet bar, al mindetti zeınetaqy jarnalary aýdarylǵan merzim mindetti zeınetaqy jarnalaryn aýdarý týraly derekter bazasynda qoljetimdi», — dep túsindirdi QR eńbek jáne halyqty áleýmettik qorǵaý vıse-mınıstri S. Jaqypova.
Azamattar konsýltasııa alý úshin 1414 biryńǵaı baılanys ortalyǵyna nemese «Azamattarǵa arnalǵan úkimet» memlekettik korporasııasynyń turǵylyqty jeri boıynsha bólimshelerine tikeleı júgine alady.
«Sondaı-aq, olar sol jerden bazalyq zeınetaqyny esepteý kezinde eskerilgen zeınetaqy júıesine qatysý ótili týraly tolyq aqparatty qamtıtyn anyqtama ala alady. Budan ózge, elektrondyq sıfrlyq qoltańba bolǵan jaǵdaıda aqparatty «elektrondyq úkimet» veb-portaly arqyly alýǵa bolady», — dedi S. Jaqypova.
