Onyń aıtýynsha, elimizdiń aldynda birinshi kezekte turǵan mindetterdiń biri — azamattardyń ómir súrý sapasyn jaqsartý, álemdik standarttarǵa saı etý, zeınetaqy júıesin damytý arqyly olardyń áleýmettik ál-aýqatyn qamtamasyz etý bolyp tabylady.
Memleket basshysynyń tapsyrmasyn iske asyrý maqsatynda zeınetkerlik jasqa laıyqty ómir súrý úshin zeınetaqy tólemderiniń tepe-teńdigin qamtamasyz etýge baǵyttalǵan «QR zeınetaqy júıesin odan ári jańǵyrtýdyń 2030 jylǵa deıingi tujyrymdamasy» qabyldanǵan.
«Prezıdent óziniń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýynda 2018 jylǵy 1 shildeden bastap bazalyq zeınetaqy eńbek ótiline baılanysty ortasha alǵanda 1,8 esege ulǵaıady dep atap ótti. Bıyl shildeden bastap bazalyq zeınetaqy taǵaıyndaý ózgeredi. Barlyq qart adamdarǵa eńbek ótili bolǵanyna nemese bolmaǵanyna baılanysty demogrant (memlekettik zeınetaqy) qamtamasyz etiledi», dedi S.Jaqypova.
Spıkerdiń túsindirýinshe, joǵaryda atalǵan Tujyrymdamada zeınetaqy tólemderiniń mólsheri ınflıasııa deńgeıinen 2% ósip, onyń kólemin jyl saıyn arttyrý kózdelgen.
«Osylaısha, 2018 jyly 1 qańtardan bastap ınflıasııa deńgeıiniń 6% bolǵanyn esepke ala otyryp, jasyna baılanysty zeınetaqy tólemderiniń mólsheri 8%-ke artty. Bazalyq zeınetaqynyń mólsheri 6%-ke joǵarylap, onyń mólsheri 15 274 teńge boldy», — dep naqtylady ol.
Zeınetkerler arasynda kedeıliktiń aldyn alý jáne azamattardyń jumysqa qabiletti shaǵynda ekonomıkalyq belsendiligin yntalandyrý maqsatynda Tujyrymdamany iske asyrý odan ári jalǵastyrylady.
Bazalyq zeınetaqyny zeınetkerlik jasqa jetken kezde, sondaı-aq, azamattardyń zeınetaqy júıesine qatysý ótiline baılanysty taǵaıyndaý qarastyrylady.
«Iаǵnı, barlyq zeınetkerlik jasqa tolǵan azamattarǵa memlekettik bıýdjetten tólenetin bazalyq zeınetaqy mólsheri eńbek ótiline jáne zeınetaqy júıesine qatysý uzaqtyǵyna baılanysty bolady», dedi S.Jaqypova.
Eger búgingi tańda barlyq zeınetkerlerge birdeı eń tómen kúnkóris deńgeıiniń 54% mólsherine bazalyq zeınetaqy nemese 15 274 teńge alyp otyrsa, bıylǵy 1 shildeden bastap onyń mólsheri zeınetaqy júıesine qatysý ótiline baılanysty artatyn bolady. О́tili on jyldan az nemese múldem bolmaǵan azamattarǵa bazalyq zeınetaqynyń eń tómengi kúnkóris deńgeıinen 54% belgilenetin bolady. Al 10 jyldan keıin árbir jyl úshin bazalyq zeınetaqy 2%-ke ulǵaıady.
«Bazalyq zeınetaqynyń eń tómengi kúnkóris deńgeıiniń joǵary mólsheri 100% nemese 28 284 teńgeni eńbek ótili 33 jyl jáne odan kóp bolǵan azamattar alatyn bolady», dep túsindirdi vıse-mınıstr.
Bul rette zeınetaqy júıesine qatysý ótili 1) 1998 jylǵy 1 qańtarǵa deıin jınaqtalǵan jáne naqty zeınetaqyny taǵaıyndaǵan kezde esepke alynǵan eńbek ótili; 2) 1998 jyldan keıingi eńbek ótili jınaqtaýshy zeınetaqy júıesine mindetti zeınetaqy jarnalary aýdarylǵan kezeńderi negizinde esepke alynatyn bolady.
«Zeınetaqyny esepteý barysynda eńbek ótili ǵana emes, eger zeınetker áıel adam bolsa, bala týyp, balany úsh jasqa deıin tárbıelep otyrǵan kezeńderi de eskeriledi. Jáne bala 16 jasqa deıin múgedek bolsa, sol múgedek balany tárbıelep, asyraǵan ananyń da eńbek ótiline bul jyldar qosylady. Sondaı-aq 1, 2 toptaǵy múgedekterge kútim jasaǵan azamattardyń jyldary eńbek ótiline engiziledi», dep qorytyndylady S.Jaqypova.
