Ol Senat depýtattary da, ózi de aqparat salasynyń mamandaryna qurmetpen qaraıtynyn, olardyń kásibı sheberlikteri, patrıottyq, adamgershilik qasıetterin joǵary baǵalaıtynyn atap ótti.
«Buqaralyq aqparat quraldarynyń róli turaqty túrde ósip keledi. Tipti áleýmettik jeliler paıda bolsa da, dástúrli buqaralyq aqparat quraldarynyń róli báseńdemeıdi. Kerisinshe olar ozyq tehnologııalardy jumys quralyna aınaldyryp otyr», dedi Q.Toqaev.
Tóraǵa bizdiń eldegi jýrnalıstıka aýqymdy reformalardyń udaıy aldyńǵy sapynda ekenin, baspa jáne elektrondyq basylymdar mıllıondaǵan adamdardyń kóńil túkpirinen berik oryn alǵanyn atap ótti. Otandyq buqaralyq aqparat quraldary kásibı túrde sheber, shynaıy jáne jedel jumys júrgizýde.
Senat Tóraǵasy bizdiń elimiz kúrdeli geosaıası jaǵdaıdaǵy damýdyń ózgerister kezeńin bastan ótkerip jatqanyna nazar aýdardy. Álemniń ár buryshynda janjaldar azaımaı otyr, sanksııalyq túrdegi teke-tirester órship barady. «Jahandyq eki úrdis – jahandaný men ultshyldyqtyń arasyndaǵy qarama-qaıshylyq ta ulǵaıa túsýde. Qazaqstan halyqaralyq qoǵamdastyqtyń jaýapty jáne bedeldi múshesi retinde óziniń ulttyq múddelerin qorǵaýda tıisti ustanymdardy tabandylyqpen pash etip otyr», dedi Toqaev.
Tóraǵa halyqtyń shynaıy senimine ıe ári shet elderde bedeli zor bizdiń elimizdiń Memleket basshysy halyqaralyq arenadaǵy Qazaqstannyń ulttyq múddesin árdaıym bıik ustap kele jatqanyn atap ótti. «Elbasynyń Kóshbasshylyq ári Tuńǵysh Prezıdent mártebesi elimizdiń saıası júıesindegi turaqtylyqtyń senimdi kepili», dedi ol.
Zań shyǵarý jumystary týraly aıta kelip, Senat Tóraǵasy «Tuńǵysh Prezıdent - Elbasy týraly», taıaýda qabyldanǵan «Qaýipsizdik Keńesi týraly» zańdar eldegi ishki jáne syrtqy saıasatty júrgizýde Elbasynyń jetekshi róline quqyqtyq kepildikterdi qamtamasyz etetini ári qazirgi álemdegi dúrbeleńge toly jaǵdaılarda mańyzdy ról atqaratyny týraly habardar etti. «Elbasy – bizdiń Konstıtýsııamyzdyń jáne ishki saıası turaqtylyqtyń senimdi kepili. Prezıdent Nursultan Nazarbaevtyń táýelsiz Qazaqstannyń negizin salýshy retindegi sińirgen eńbegi asa aýqymdy, tarıhı mańyzy zor», dep atap ótti Q.Toqaev.
Tóraǵa Prezıdenttiń taıaýdaǵy Joldaýynda sıfrlyq tehnologııalardyń dendep enýine baılanysty qazaqstandyqtardy jahandyq ózgerister men qaterlerge daıyn bolýǵa shaqyrýyna jýrnalısterdiń nazaryn aýdardy. Q.Toqaevtyń pikirinshe, bul mindet tek qoǵamnyń qoldaýymen tabysty sheshiledi. Sondyqtan sıfrlandyrý ıdeıasynyń mán-mańyzyn qalyń buqaraǵa jetkizýde jýrnalısterge asa jaýapty mindet júktelip otyr.
Buqaralyq aqparat quraldary jastardyń kúsh-qýatyn shyǵarmashylyq arnaǵa qaraı burýy tıis. Jas urpaq barlyq áleýmettik mańyzdy is-sharalarǵa belsene aralasýy qajet. Senat basshysy elimizdiń dástúrli qundylyqtaryn saqtaýǵa jáne ulyqtaýǵa, qoǵamnyń rýhanı ómirin jańartýǵa baǵyttalǵan Elbasynyń «Rýhanı jańǵyrý» tujyrymdamasyn iske asyrýda aqparat quraldarynyń róli erekshe dep sanaıdy.
Qasym-Jomart Toqaev elimizdiń aqparat salasynda belsendi qyzmet etip júrgen birqatar baspasóz ókilderine Senattyń Qurmet gramotasyn jáne Alǵys hatyn tabys etip, Otanymyzdyń jarqyn keleshegi jolyndaǵy eńbekteri tabysty bolýyna tilektestigin aıtty.
