Elbasy Nursultan Nazarbaevtyń Jarlyǵymen 1 shilde Ulttyq dombyra kúni bolyp bekitilgen bolatyn. Qazaqtyń tól aspabyn jalpyulttyq deńgeıde áspetteıtin jańa meıramnyń bolǵanyna Mádenıet jáne sport mınıstrligine qarasty Joǵary oqý oryndary jáne óner ujymdary rızashylyqtaryn bildirýde. Bul jóninde professor, Qazaqstannyń eńbek sińirgen ártisi, Qazaq ulttyq óner ýnıversıtetiniń prorektory Turar Álipbaev, Qazaqstannyń eńbek sińirgen qaıratkeri, Qurmanǵazy atyndaǵy Qazaq memlekettik akademııalyq halyq aspaptar orkestriniń dırektory Nurqısa Dáýishev, kúıshi, Qazaqstannyń eńbek sińirgen ártisi, Qurmanǵazy atyndaǵy Qazaq ulttyq konservatorııasynyń professory Aıgúl Úlkenbaeva baıandady.
Memleket Basshysy «Ulttyq dombyra kúnin bekitý týraly» 2018 jylǵy 12 maýsymdaǵy № 699 Jarlyǵyna qol qoıdy. Elbasynyń osy jarlyǵyn qoldaý maqsatynda Almatydan arnaıy Ahmet Jubanov jáne Kúlásh Báıseıitova atyndaǵy mamandandyrylǵan mektepterinen 500 daryndy oqýshy dombyrashylar Astanaǵa at basyn tiremek. Qurmanǵazy atyndaǵy Qazaq memlekettik akademııalyq halyq aspaptar orkestriniń halyqaralyq, respýblıkalyq baıqaýlardyń 90 laýreat dombyrashysy jáne N.Tilendıev atyndaǵy akademııalyq folklorly-etnografııalyq «Otyrar sazy» orkestrinen 70 adam arnaıy kelip qatyspaqshy. Sonymen qatar Qurmanǵazy atyndaǵy Qazaq ulttyq konservatorııasynan 200 ustaz ben stýdent, Qazaq ulttyq óner ýnıversıtetinen 500 jas ónerpaz dombyrashy qatysady.
1 shilde kúni saǵat 12:00-de «Qazaq eli» monýmentiniń alańynda merekelik konsert jáne «Dombyra – asyl mura» kópshilik serýenderi ótedi.
