Oblystyń 7 aýmaǵynan ardagerlerdiń basynan ótken qyzyqty oqıǵalary jáne ómirlik joly áleýmettik jelilerge #Jeńisesimderi #Ardagerlerdiardaqtaıyq atty heshtegtermen jarııalandy.
Aqtaý qalalyq «Nur Otan» partııasy fılıalynyń qyzmetkerleri Uly Otan soǵysy ardageri Boqaev Bısen Rahmetulynyń úıine baryp, ol bastan ótkergen qıyn-qystaý kezeńder jóninde áńgime órbitti. Ardagerdiń aıtýynsha Uly Otan soǵysynyń bastalǵanyna jyl tolǵanda jas jigit ásker qataryna shaqyrylyp, Qazaqstan-Qytaı shekarasyn kúzetetin Jarkent shekara otrıadyna túsken.
«Osy áskerı bólimde 1944 jyldyń sáýirine deıin qyzmet etip, Dýshanbe qalasynda jasaqtalǵan 22-shi shekara otrıadynyń sapyna alyndym. Munda kishi serjant qol pýlemetshisi bolyp, nemis-fashıst basqynshylarynan azat etýge kúsh jumsaǵan toppen birge boldym. Sol jyly Dnestrdegi «Iаssy-Kıshınevti azat etý» operasııasyna qatysyp, jan berip, jan alysqan shaıqastarda júrdik. Shekarashylar Bessarabııa jerinde, Dnestr men Prýt ózenderiniń boıyn qorǵaý maqsatynda qaldyryldy. Bizge munda Keńes Odaǵynyń memlekettik shekarasyn kúzetý mindeti júktelgen bolatyn», dep eske alady ol.
Osylaısha, qashan soǵys aıaqtalyp, Uly Jeńisti shekara boıynda qarsy alǵan shekarashy Bısen Rahmetuly 1949 jyly Krasnovodsk qalasyna oralady. Uly Otan soǵysynyń ardageri Reseı, Moldova, Ýkraına jerlerin jaý qolynan azat etý operasııalaryna qatysqany úshin marapattalǵan. Otbasynda 2 ul, 7 qyz tárbıelep ósirdi. Uzaq jyldar saýda salasynda qyzmet atqaryp, zeınetkerlikke shyǵady. 1993 jyly týǵan Otanyna oralyp, kóńili ornyna túsken Bısen ata men Oǵylhan ana ul-qyzdarynan jıyrmaǵa jýyq nemere, shóbere súıip otyr.
Sondaı-aq, eńbekke erte aralasqan Mańǵystaý aýdany turǵyny, tyl ardageri A. Ábisheva, Uly Otan soǵysy ardagerleri: Qaraqııa aýdany ardageri Qalybaev Sharhatbaı, Munaıly aýdany – Ýtaev Abdýlla, Beıneý aýdany – Myltyq Qarabatyrov jáne Jańaózenniń turǵyny Eńsegenov Keńesbaı qarııalar synyqtyń kózindeı árdaıym este ustap qurmettep júrýge laıyq esimder.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
