Besqaraǵaı aýdanynan arnaıy kelgen Bashkóldik tatar aǵaıyndar ulttyq taǵamdarynan dám tatyrdy. Barlyǵy jınalyp, Tatar halqynyń talantty uly Ǵabdolla Toqaı eskertkishiniń basyna gúl shoqtaryn qoıdy. Eldi berekeli tirlikke bastaıtyn sharany dinine berik tatar halqynyń dástúri boıynsha ımam tilek aıtyp bastady.
Sharaǵa oblystyq ishki saıasat basqarmasynyń basshysy Nellı Krasnobaeva, Semeı qalasynyń ákimi Ermak Sálimov, Besqaraǵaı aýdanynyń ákimi Dáýlet Batyrbaevtar qatysty.
– Qurmetti semeılikter jáne qala qonaqtary! Yntymaq-birligi jarasqan, Abaı, Muhtar, Shákárimder týǵan qasterli ólkede biz baýyrlas tatar halqynyń «Sabantoı» merekesin Besqaraǵaılyq baýyrlarymyzben birge toılaýdamyz,-dedi Semeı qalasynyń ákimi Ermak Sálimov,-tatar halqynan qanshama talanttar shyqqan. Beıbitshilikke, bereke-birlikke shaqyratyn bul mereke bizder úshin asa qymbat. Sondyqtan barshańyzǵa myqty densaýlyq, otbasylaryńyzǵa amandyq tileımin, mereke qutty bolsyn!
Oblystyq ishki saıasat basqarmasynyń basshysy Nellı Krasnobaeva oblys ákimi Danıal Ahmetovtyń atynan jınalǵan qaýymdy quttyqtap, arnaıy marapattaryn tabys etti. Besqaraǵaı aýdanynda Dostyq úıiniń jumysyn jandandyrǵany úshin aýdan ákimi Dáýlet Batyrbaev alǵys hatpen marapattaldy.
– Semeı qalasynyń turǵyndaryn, oblys halqyn quttyqtaımyn!-dedi Besqaraǵaı aýdanynyń ákimi Dáýlet Batyrbaev,-osy Sabantoıǵa Besqaraǵaı aýdany úsh avtobýs bolyp lyqa tolyp keldik. Bashkól degen aýylymyz bar, kil tatarlar turady. Bıyl Semeı qalasynyń ákimdiginiń shaqyrýymen osynda keldik. Qazaq úı tiktik, palaý festıvalin ótkizip jatyrmyz. Besqaraǵaıda 28 ult ómir ózara tatý-tátti ómir súredi. Memleket basshysy Nursultan Nazarbaevtyń salıqaly, sarabdal saıasatynyń arasynda aýyldaǵy Dostyq úıiniń túrli ulttary tatýlyq pen turaqtylyqty bir shańyraq astynda saqtap keledi. О́zim de osy Semeıdiń týmasy bolǵandyqtan Sabantoı maǵan da asa qymbat. Osyndaı sharany uıymdastyrǵan oblystyq ákimshilikke Besqaraǵaı halqy atynan rızashylyǵymdy jetkizgim keledi.
Eńbek ardageri Rashıda Hasanovanyń aıtýynsha, «Sabantoı» - tatar tilinde «jer óńdeý toıy» degen sóz eken, otbasylyq mereke. Tatar halqynyń jerdi óńdep, egin salatyn kóktem kezeńiniń toıy. Egin bitik shyqsyn, jıyn-terim mol bolsyn, el toq bolsyn degen tatar eliniń arman-tilekteri jınaqtalǵan. Merekede tatar halqynyń ulttyq oıyndary - tatar kúresi, arqan tartý jáne taǵy da basqa kóptegen sporttyq oıyndar oınaldy. Sabantoıǵa kelgender tatar eliniń ulttyq taǵamdarynan dám tatyp, konserttik baǵdarlamany tamashalady.
Raýshan NUǴMANBEKOVA
Sýretter avtordiki.
SEMEI
