«Astana» halyqaralyq qarjy ortalyǵynyń resmı túrde ashylýyna sanaýly kúnder qaldy. Osyǵan baılanysty qazirgi tańda jergilikti bırjanyń qazaqstandyq jáne halyqaralyq brokerlik kompanııalarmen saýda operasııalaryn júrgizýge daıyndyǵy pysyqtalýda. Sonymen qatar «AıOsKo» qundy qaǵazdar jónindegi halyqaralyq komıssııa, «BıSıBıEs» banktik qadaǵalaý jónindegi Bazel komıteti jáne «AıEfEsBı» Islam qarjylyq qyzmet kórsetý keńesi syndy tanymal uıymdarmen ortaq standarttar bekitilip, jalpyǵa birdeı qaǵıdattar basshylyqqa alynbaq. Osy erejeler kapıtal naryǵynyń tıimdiligi men tazalyǵyn qamtamasyz etip qana qoımaı, júıeli túrde jumys isteýge múmkindik beredi.
«Astana» halyqaralyq qarjy ortalyǵynyń basqarýshysy Qaırat Kelimbetov:
− Memleket basshysynyń bes ınstıtýttyq reformasyn júzege asyrýǵa baǵyttalǵan «100 naqty qadam» ult jospary strategııalyq jospary boıynsha AHQO-nyń jumysyn jandandyrýda asa mańyzdy 3 reformany, ıaǵnı memlekettik qyzmetterdiń sapasyn jaqsartý, ekonomıkany ártaraptandyrý, onyń ishinde jekeshelendirýdi jetildirý, zańnyń ústemdigin arttyrý baǵyttary boıynsha jumys júrgiziledi. Buǵan deıin aıtylǵandaı, «Astana» halyqaralyq qarjy ortalyǵy aǵylshyn zańnamasy boıynsha jumys isteıdi. Búgingi kúni atalǵan júıe London, Nıý-Iork, Dýbaı, Sıngapýr syndy álemdik qarjy ortalyqtarynda keńinen qoldanyldy. Buǵan qosa, AHQO janynan qurylatyn táýelsiz sot pen táýelsiz arbıtraj ortalyǵynyń jumysy sheteldik ınvestorlardyń senimin arttyrýǵa múmkindik beredi, − dedi.
Elbasynyń «100 naqty qadam» Ult josparynda bekitilgen tapsyrmasyna sáıkes, elimizde jekeshelendirý sharalaryn júzege asyrý boıynsha AHQO jekege ótetin birqatar nysandardy anyqtaǵan. Q.Kelimbetov atap ótkendeı, 2018-2020 jyldary «EırAstana», «Qazaqtelekom», «Qazatom-
ónerkásip» kompanııalary jekeshelendirýge berilse, 2019-2020 jyldary «QazMunaıGaz» ben «QTJ»-ny jekege ótkizý josparlanyp otyr. Joǵaryda atalǵan kompanııalar el ekonomıkasyndaǵy IJО́-niń 40 paıyzyn quraıdy. Buǵan deıin qazaqstandyq kompanııalar London, Gonkong syndy alpaýyt saýda naryqtaryna bet burǵany belgili, óz kezeginde AHQO elimizdegi kompanııalardy tartý úshin barlyq múmkindikterge jol ashady.
Jekeshelendirýdiń de atalǵan ortalyq aıasynda ótkizilýi asa mańyzdy qadam bolmaq.
− Biz osy maqsatta álemdegi eń iri bırjalarmen baılanys ortnatqan halyqaralyq Astana bırjasyn qurdyq. Bul rette aktıvtermen jumys júrgizý isi de negizgi baǵyttardyń biri. «Astana» halyqaralyq qarjy ortalyǵy aldaǵy 20 jyl ishinde álemdegi ozyq sanattaǵy 20 ortalyqtyń qataryna enýdi kózdeıdi.Oǵan barlyq jaǵdaı jasalyp otyr», − dedi AHQO-nyń basqarýshysy.
Elimizdiń bas qalasy – Astananyń 20 jyldyq mereıtoıymen tuspa-tus kelgen AHQO-nyń ashylýy el ekonomıkasynyń aldaǵy ýaqytta jańa baǵytta tyń serpinmen damı túsýine negiz bolary sózsiz.
Erkejan AITQAZY,
«Egemen Qazaqstan»
