Jas dombyrashylar jarysy aýdan ortalyǵyndaǵy Sháken Aımanov atyndaǵy mektep-ınternatta ótti. Baıqaýdyń aldynda Jaıaý Musa atyndaǵy Baıanaýyl balalar óner mektebiniń Zınur Ǵalymov dırıjerlik etetin orkestri K.Áldekenovtiń «Jańa ǵasyr», Nurǵısa Tilendıevtiń «Murager», Qurmanǵazynyń «Adaı» kúılerin oryndap berdi. Sondaı-aq Darııa Úkibaı Jaıaý Musanyń «Baıanaýyl» ánin shyrqady.
Kúıshiler úsh topta óner kórsetti. Ár qatysýshy úsh kúıden oryndady. Birinshi kúni «Kishi top» pen «Joǵary toptyń» birinshi kezeńiniń qatysýshylary tolyq tyńdaldy jáne «Orta top» úmitkerleriniń jartysy ónerlerin ortaǵa saldy. Birinshi saıys kúniniń qorytyndysy boıynsha «Kishi top» úzdikteri men «Joǵary top» fınalısteri anyqtaldy. Birinshi kúni qatysýshylar Dına, Qurmanǵazy, Ábdı, Aqbıkesh, Aqqyz, Qyzdarbek, Qazanǵap, Baıjigit, О́skenbaı, Seıtek, Táttimbet, Álshekeı, Dáýletkereı sekildi kompozıtorlar týyndylary men halyq kúılerin, Qarshyǵa Ahmedııarov, Maǵaýııa Hamzın, Murat О́skenbaev, Seken Turysbekovterdiń shyǵarmalaryn oryndady.
Sóıtip «Bas júlde» ıegeri anyqtaldy. Ol – Jaıaý Musa atyndaǵy Baıanaýyl balalar óner mektebiniń oqýshysy Danagúl Barken.
Byltyr Aqtaýda ótken «Kaspıı juldyzy» atty respýblıkalyq baıqaýda «Aqjarma» kúıin oryndaǵan Danagúl birinshi oryndy ıelengen edi. Budan keıin, qazylar alqasynyń tóraǵasy, óner zertteýshisi Murat Ábýǵazy «Kishi topta» úzdik atanǵan Jambyl oblysy, Jambyl aýdany Muqan Tólebaev atyndaǵy balalar mýzyka mektebiniń oqýshysy Baqdáýlet Janatbekke, «Orta topta» oza shapqan Astanadaǵy №1 balalar mýzyka mektebiniń oqýshysy Amalbek Omarbekovke, «Joǵary topta» jarqyldaǵan Aqmola oblysy, Esil aýdany balalar mýzyka mektebiniń oqýshysy Dıas Orynbasarǵa birinshi oryn júldesin tapsyrdy.
Júldegerler óner zertteýshisi Murat Ábýǵazy sııaqty «Qurmanǵazy, Táttimbet jáne Arqa kúıleri», «Áshim jáne Ile aımaǵynyń kúıleri», «Saryarqa ánderi», «Shyǵystyń shyńyraý kúıleri» oqý-ádistemelik kitaptaryn jazǵan kúıshi aǵalarynyń qolynan marapat alyp, taǵy da bir qýandy.
Al II oryndy ıelengen Jaıaý Musa atyndaǵy Baıanaýyl balalar óner mektebiniń oqýshysy Aıbar Pázil men Shyǵys Qazaqstan oblysy, Qaraýyl aýdany Jánibek Kármenov atyndaǵy saz mektebiniń oqýshysy Jiger Arqashty («Kishi topta»), taǵy bir qaraýyldyq talant Tóleýtaı Dúısenov pen Almaty qalasy bilim basqarmasy óner mektebiniń oqýshysy Aqnur Túktibaevany («Orta topta»), Astana qalasynyń № 1 balalar mýzyka mektebi oqýshysy Dına Kódebaı men Ekibastuz qalasy M.Glınka atyndaǵy balalar mýzyka mektebiniń oqýshysy Arman Serikovti («Joǵary topta») kúıshi, halyqaralyq, respýblıkalyq kúıshiler baıqaýynyń laýreaty Rústem Núrkenov marapattady.
Sonymen birge Jaıaý Musa atyndaǵy Baıanaýyl balalar óner mektebiniń oqýshysy Allajar Jańbyrbaı, Almaty qalalyq bilim basqarmasy óner mektebiniń oqýshysy Mansur Nurǵojaev «Kishi topta», Semeı qalasy №1 balalar mýzyka mektebiniń shákirti Nurjan Nurlan, Jambyl oblysy, Jambyl aýdany Muqan Tólebaev atyndaǵy balalar mýzyka mektebiniń ókili Nurzat Rahmanberdi «Orta topta», Jambyl oblysy, Jambyl aýdany Muqan Tólebaev atyndaǵy balalar mýzyka mektebiniń oqýshysy Álimqul Sultan, Maıqaıyń balalar óner mektebiniń oqýshysy Nurjan Ǵabdulqalıev «Joǵary topta» úshinshi oryn alyp, júldegerler atandy. Laýreattardy halyqaralyq, respýblıkalyq kúıshiler baıqaýynyń bas júlde ıegeri Aıtolqyn Toqtaǵan marapattady.
Marapattaý rásimi gala-konsertke ulasyp, baıqaý qatysýshylary atynan Batys Qazaqstan oblysy Jańaqala aýdandyq Qalı Jantileýov atyndaǵy balalar saz mektebiniń kúıshileri halyq kúıi «Ortekeni» baıanaýyldyqtarǵa tartý etti. Qazylar alqasynyń tóraǵasy Murat Ábýǵazy oryndaǵan kúıler de kúmbirlep kópshiliktiń esinde qaldy.
– Eki kún boıy Baıanaýyldy kúıge bólegen baıqaý keshe men búginniń máńgilik úndesken rýhanı jańǵyrýy ispetti. Kúı qudiret degen osy! – deıdi áriptesimiz Elaman Qabdyláshim. О́ıtkeni bul qudiretti erteńge jalǵastyratyn osy jastar!
Jas kúıshiler ásem Baıanaýyldan «Kelesi, kezdeskenshe!» dep attandy.
Farıda BYQAI,
«Egemen Qazaqstan»
Pavlodar oblysy,
Baıanaýyl aýdany
