Ult tutastyǵynyń belgisi – rýh tutastyǵy. Osy oraıda elimizde júzege asyrylyp jatqan «Rýhanı jańǵyrý» baǵdarlamasynyń mańyzyn asha túsken dástúrli mýzyka keshi baıyrǵy mýzykalyq murany baıyptaý, saralaý, kópshilik qaýymǵa keńinen tanytý, dástúrli óner ókilderin yntalandyrý, qurmet kórsetý aıasynda kórermenderdiń kóńil tórinen oryn aldy. Ásirese, kúmis kómeı ánshi Erkin Shúkiman oryndaǵan Birjan saldyń áni «Aıtbaı», halyq áni «Ahaý-kerimdi» quıqyljytqan Aıgúl Qosan, jeztańdaı ánshi Tileýles Qurmanǵalıevtiń Sádiqojanyń áni «Sary bıdaıdy» oryndaýy kópke deıin umytylmaıtyn ǵajap án áleminiń jaýharlary deýge bolady.
Elorda kúni qarsańyndaǵy qazaqtyń qońyr áýenin, asqaq áni men tolǵaýly kúıin tyńdaýǵa kelgen jurtshylyq sonymen birge Ramazan Stamǵazıev, Sáýle Janpeıisova, Uljan Baıbosynova, Ardaq Isataeva, Nurjan Janpeıisov, Erbolat Shaldybekov, Dáýrenbek Árkenov, Sholpan Dárjanova, Nurken Áshirov, Ospan Qulsymaq, Sáýlejan Taǵzııa jáne basqa da belgili dástúrli án men kúı sheberleriniń ónerine tánti boldy.
