1 qańtar – bir jyl buryn qabyldanǵan «Astana – jańa qala» arnaıy ekonomıkalyq aımaǵyn qurý týraly» Qazaqstan Respýblıkasy Prezıdentiniń Jarlyǵyna sáıkes qurylǵan arnaıy ekonomıkalyq aımaq óz jumysyn bastady. Qazirgi tańda AEA aýmaǵy 7634,71 gektardy qurap otyr.
22 qańtar – Prezıdent N.Nazarbaev Astana qalasynda Eýrazııalyq ekonomıkalyq qaýymdastyqtyń Bas hatshysy G.Rapotamen kezdesip, EýrAzEQ qyzmetine baılanysty birqatar strategııalyq máselelerdi tal-qylady.
11 aqpan – Elbasy N.Nazarbaev Úndistanǵa resmı saparmen baryp, Delı qalasynda ashylǵan Abaı atyndaǵy kósheniń ashylý saltanatyna qatysty.
28 aqpan – Almatyda Ortalyq Azııa memleket basshylary Ortalyq Azııa yntymaqtastyq uıymyn qurý týraly shartqa qol qoıdy.
28 aqpan – elorda turǵyndary úshin emdeý-saýyqtyrý qyzmetin jaqsartý maqsatynda Astanada «Demeý» otbasylyq-dárigerlik ambýlatorııasy ashyldy.
26 naýryz – Vashıngton Qazaqstanǵa naryqtyq ekonomıkaly memleket mártebesin berý týraly resmı habarlady. Bul oqıǵa elimizge ınvestorlar tartýmen qatar, respýblıkamyzdyń halyqaralyq ımıdjin kóterýge zor septigin tıgizdi.
25 sáýir – Almaty qalasynda birinshi Eýrazııa medıaforýmy bastaldy. Buǵan álemniń 30 elinen kelgen jetekshi aqparat agenttikteriniń 200-ge jýyq jýrnalısi qatysty.
13 mamyr – Máskeýde eki memleket basshylary N.Á.Nazarbaev pen V.V.Pýtın kezdesip, Kaspııdiń soltústik bóliginiń taǵanyn paıdalaný máselesin sheshti.
3 maýsym – Azııadaǵy ózara yqpaldastyq jáne senim sharalary jónindegi keńestiń (AО́SShK) birinshi sammıti ashyldy.
4 maýsym – Astana tarıhynda tuńǵysh ret asa iri halyqaralyq jarys bokstan H álem kýbogi elordadaǵy «Qazaqstan» sport saraıynda saltanatty túrde ashylyp, bul rásimge Elbasy N.Nazarbaev qatysty.
7 maýsym – Reseıdiń Sankt-Peterbýrg qalasynda Shanhaı yntymaqtastyǵy uıymyna múshe elderdiń kezekti sammıti ótip, jıynǵa qatysýshy memleket basshylary ortaq Deklarasııaǵa qol qoıdy.
29 tamyzda – Astana qalasynyń sımvoly retinde salynǵan «Báıterek» monýmenti Elbasy N.Á.Nazarbaevtyń qatysýymen saltanatty túrde ashyldy. Atalmysh nysannyń bıiktigi – 97, dıametri – 27 metr. Ushar basynda altyn shar ornalasqan. Shynymen kómkerilgen kúmbezdiń salmaǵy – 70 tonna. Altyn shar men ǵımarattyń negizgi kireberisi bir-birimen «oqpan» dep atalatyn salmaǵy 695 tonna metall quralymmen tutastyrylǵan.
9 qyrkúıek – Memleket basshysy N.Á.Nazarbaev Astanaǵa resmı saparmen kelgen О́zbekstan basshysy I.Kárimovti qabyldap, eki el arasyndaǵy memlekettik shekarany delımıtasııalaý isin tolyq aıaqtady.
14 qyrkúıek – Astana qalasyndaǵy «Shubar» kentinde Elbasy Nursultan Nazarbaevtyń qatysýymen «VITA» atty taza sý óndiretin kásiporyn ashyldy.
5 qazan – elorda tórinde ornalasqan «Kongress-holda» Qazaqstannyń halyq jazýshysy, Memlekettik syılyqtyń laýreaty, qalamger Sherhan Murtazanyń 70 jyldyǵyna arnalǵan saltanatty kesh ótti. Mereıtoı ıesi týraly bas baıandamany klassık jazýshy Ábish Kekilbaev jasady.
17 qazan – Qazaqstan Prezıdenti N.Á.Nazarbaev Astanaǵa resmı saparmen kelgen BUU Bas Hatshysy K.Annanmen kezdesti. Bul oqıǵa – elimizdiń saıası ómirinde kórnekti oryn alǵan jáne Qazaqstannyń BUU-men yntymaqtastyǵynyń mańyzyn arttyrǵan shara boldy.
23 qazan – Túrkistan qalasynda Dúnıejúzi qazaqtarynyń ekinshi quryltaıy ótti. Quryltaıǵa 32 memleketten 400-den astam ókil kelip qatysty. Jıynda oralmandardyń elge oralý máselesi qaralyp, kóshi-qon kvotasynyń mólsherin ulǵaıtý týraly sheshim shyqty.
19 jeltoqsan – Astananyń jańa ortalyǵynda «QazMunaıGaz» ulttyq kompanııasynyń ǵımaraty paıdalanýǵa berildi. Nysannyń ashylý saltanatyna Elbasy Nursultan Nazarbaev qatysty.
23 jeltoqsan – Qytaı Halyq Respýblıkasyna memlekettik saparmen barǵan Elbasy Nursultan Nazarbaev birqatar ekijaqty qujatqa qol qoıdy. Onyń eń mańyzdysy – Qytaı men Qazaqstan arasyndaǵy dostyq, tatý kórshilik týraly shart.
27 jeltoqsan – elorda tórinde Ortalyq Azııa yntymaqtastyq uıymyna qatysýshy memleketter basshylarynyń tórtinshi kezdesýi ótti.
Daıyndaǵan Beken QAIRATULY,
«Egemen Qazaqstan»
