Qazirgi kúni aqparattyq-kommýnıkasııalyq tehnologııalar álemdik damýdyń alǵyshartyna aınalyp otyr. Osy oraıda qoǵamnyń jańaryp, damýyna yqpal etetin birden-bir kúsh – jýrnalıstıka bolyp qala bereri sózsiz.
Sıfrlandyrýdyń saldarynan kóptegen mamandyqtardyń qatardan shyǵyp qalatynyn aıtýda zertteýshiler. Alaıda aqparat salasynyń mamandary dárigerler men muǵalimder sııaqty qashanda mańyzdy bola bermek. Elbasy aıtqandaı, «HHI ǵasyrda medıa salasy álemdegi oqıǵalardy taratýshy bolyp qana qoımaı, kóbine onyń jekelegen elderde jáne tutas álemde qalaı óristep otyrǵanyn aıqyndaıtyn jetekshi kúshke aınaldy».
Osy oraıda aqparattyq qaýipsizdik degenimiz ulttyq qaýipsizdik máselesi ekenin qashanda alǵa tartatyn Memleket basshysynyń tikeleı qamqorlyǵynyń, qoldaýynyń arqasynda táýelsizdikten beri elimizdiń aqparattyq keńistiginde úlken dúmpý bolǵanyn atap aıtý lázim. Gazet-jýrnal, telearna men radıo qatary áldeneshe esege kóbeıip, otandyq BAQ naryǵynda báseke qyza bastady.
Sonaý toqsanynshy jyldardyń ózinde Memleket basshysynyń nusqaýlary boıynsha aqparat salasynyń damýyna tikeleı yqpal etken mańyzdy sheshimder qabyldandy. Sonyń ishinde BAQ-ty qosymsha qun salyǵynan bosatýǵa qatysty jeńildikter jasaldy. «BAQ týraly» zań qabyldanýymen elimizde memlekettik emes aqparat quraldarynyń damýyna jol ashyldy. Sala qyzmetkerlerine arnaıy Prezıdent syılyǵy men granttary taǵaıyndalyp, jyl saıyn úzdikter eńbegi laıyqty baǵasyn alýda.
Elordada «Qazmedıa ortalyǵy» atty zamanaýı medıa ortalyq boı kótergennen beri otandyq telearnalar men radıolardyń sapasy tehnıkalyq jaǵynan ǵana emes, mazmundyq jaǵynan da birneshe esege kúsheıdi.
Osydan eki jyl buryn Elbasynyń tikeleı tapsyrmasymen Aqparat jáne kommýnıkasııalar mınıstrligi qurylyp, onyń aldyna birqatar mindetter qoıylǵany belgili. О́z kezeginde, mınıstrlik osy maqsat-mindetterdi oryndaý boıynsha aýqymdy sharalardy júzege asyrýda. Sonyń ishinde, memlekettik telearnalardy, radıo men baspa BAQ-ty, ınternet-resýrstardy jańǵyrtý boıynsha úlken jumystar júzege asty. Aqparat jáne kommýnıkasııalar salalaryna qatysty zań jobasy qabyldandy. Mass-medıa úshin ákimshilik júktemeler men shekteýlerdi azaıtý boıynsha birqatar jeńildikter jasaldy.
Jýrnalıster qaýymynyń eńbegin laıyqty baǵalaý maqsatymen ótken jyly Aqparat jáne kommýnıkasııalar mınıstrligi «Tumar» jáne «Úrker» syılyqtaryn taǵaıyndady. «Nur Otan» partııasynyń «Nur Suńqar» syılyǵy, sonymen qatar kóptegen uıymdar men mekemeler tarapynan taǵaıyndalǵan marapattar da dástúrli túrde tabystalyp keledi.
Alash qaıratkeri Mirjaqyp Dýlatov aıtpaqshy, «Qaı eldiń baspasózi kúshti bolsa, sol eldiń ózi de kúshti». Táýelsizdigimizdiń tuǵyryn bekitip, eldigimizdi nyǵaıtý jolyndaǵy búgingi kúnde «tórtinshi bılik» degen beıresmı ataýǵa ıe qaýymǵa jedel ári shynaıy habar taratýmen birge memlekettik múddege qoǵamdy jumyldyrý, ulttyń birligin nyǵaıtý sııaqty jaýapty mindetter júktelip otyr. Otandyq BAQ bul mindetti abyroımen atqaryp keledi dep aıtýǵa tolyq negiz bar.
Qambar AHMET,
«Egemen Qazaqstan»
