Jıynǵa Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov, Arnaıy monıtorıng tobynyń tóraıymy Aıgúl Soloveva, Memlekettik qyzmet isteri jáne sybaılas jemqorlyqqa qarsy is-qımyl agenttiginiń qoǵammen baılanys departamentiniń dırektory Arman Berdalın, «Halyqtyq sybaılas jemqorlyqqa qarsy komıteti» QQ prezıdenti Musaǵalı Dýambekov qatysyp, atqarylǵan jumys jóninde aqparat berdi.
«Qazaqstanda túbegeıli reformalardyń arqasynda sybaılas jemqorlyqqa qarsy zańnamanyń jańa modeli qalyptasyp, álemdik standarttarǵa sáıkes ınstıtýttar men mehanızmder qoldanysqa endi. Basty maqsat – sybaılas jemqorlyqtyń saldarymen kúresý emes, olardyń sebepterin anyqtap, túbegeıli joıý. Sondyqtan qoǵamdy qatystyrý arqyly jemqorlyqqa qarsy mádenıetti qalyptastyrý qajet. Azamattardyń qoǵamdyq baqylaýdy júzege asyrýyna jáne memlekettik organdardyń qyzmetin baqylaýyna múmkindik beretin memlekettiń ashyqtyǵy men esep berýshiligin qamtamasyz etý qajet», dedi Oljas Bektenov.
Sonymen qatar Arman Berdalın Agenttiktiń janynan qurylǵan monıtorıngtik toptyń mańyzdylyǵyna toqtaldy.
«Bul, eń aldymen, jasalyp jatqan memlekettik qyzmettiń kemshiligin anyqtaýǵa, jemqorlyqty qaıtip jeńemiz degen suraqqa qoǵamnyń kózimen jaýap izdeýge múmkindik beredi. Osy oraıda biz Qazaqstannyń barlyq oblystaryn aralap shyqqan bolatynbyz. Aıta ketý kerek, tek qana oblys ortalyqtaryn ǵana emes, sonymen birge, shalǵaı jatqan aýyl-aýdandarǵa da soqtyq. Ol jerdegi halyqtyń oı-pikirin tyńdap, hal-ahýalyn kórip, kórsetilip jatqan memlekettik qyzmet der kezinde jáne ýaqtynda sapaly jetip jatyr ma degen suraqtar tóńireginde saraptama júrgizdik. Qazirgi ýaqytta memlekettik qyzmettiń 746 túri kórsetiledi. Solardyń 70 paıyzdan astamy elektrondy túrde qoljetimdi bolyp otyr. Biz ózimizdiń saparymyz barysynda keıbir eldi mekenderde ınternet jelisi qosylmaǵanyn kórdik. Buryndary bir japyraq qaǵaz alý úshin aýdan, odan qaldy oblysqa barýǵa týra keletin. Qazirgi tańda bul jumysty úıden shyqpaı-aq oryndaýǵa múmkindik týdy. Degenmen, halyq sony tolyqtaı ıgerdi me, joq pa, osyny anyqtaý bizdiń basty mindetimiz», dedi ol.
Raýan QAIDAR,
«Egemen Qazaqstan»
