Jalpy bolashaqta Astana aýdany dep ataýǵa laıyq Ýsolka shaǵyn aýdany oblys ortalyǵynyń ońtústik bóliginde, Ertis ózeniniń jaǵalaýyna qonys tepken. Aýdanda 80-shi jyldardan bastap turǵyn úıler qurylysy boı kóterip, dúkender, mektepter salyna bastady. Shetkeri aýdan bolǵandyqtan qalaaralyq tramvaı jolyna qosylǵan, shahardaǵy baǵyttaǵy shaǵyn avtobýstar da tynymsyz.
Qazir bul shaǵyn aýdanǵa tipti jaqsy kóńil bólinýde. Elimizde qabyldanǵan memlekettik turǵyn úı baǵdarlamasyna oraı jıyrmaǵa jýyq turǵyn úı salyndy. Qurylys áli de jalǵasýda. Aýdanda jarqyrǵan jańa mektep, balabaqsha, emhana paıdalanýǵa berildi. Kardıohırýrgııalyq ortalyq, Nazarbaev zııatkerlik mektebi, birneshe sporttyq ortalyqtar, basseın, mádenı oryndar, saýda dúkenderi, aýla klýbtary jumys isteýde. Oblys ortalyǵynyń jańa kelbetindeı jarqyrap órkendep, ósip keledi.
Al endi kelesi jyldyń sońyna qaraı paıdalanýǵa beriletin «Aqyldy úı» shaǵyn aýdannyń tipti sánin de, mánin de keltirmek. Jańa zamannyń órkenıetti turǵyn úıi turǵyndardy tańǵaldyrmaq.
Kásiporynnyń bas dırektory Oleg Perfılovtyń aıtýynsha, birinshi kezekte, «aqyldy úıdiń» ár páterine ystyq, sýyq sý men jylýdy esepteıtin qurylǵylar ornatylady. Jylý batareıalarynda arnaıy rettegishter jáne sýdy salqyndatatyn klımat júıesi jasalýda. Kún ystyq kezde júıe boıynsha ótetin salqyn sý bólmeniń aýasyn salqyndatady. Iаǵnı, úı ózin-ózi salqyndata alady. Qajetti qondyrǵylar ornatylady.
«Aqyldy úı» – ómir súrýge asa qolaıly, únemdi, jaıly, qaýipsiz sanalady. Elimizge keletin ınvestorlar da qalany emes, ómir súrýge, jumys isteýge qolaıly mekendi tańdaıdy eken. Bıylǵy Joldaýda da «Aqyldy qalalar» «aqyldy ult» úshin, «Aqyldy qalalar» óńirlik damýdyń, ınnovasııany taratýdyń jáne elimizdiń barlyq aýmaǵynda turmys sapasyn arttyrýdyń lokomotıvterine aınalady» degen joldar bar.
S. Toraıǵyrov atyndaǵy ýnıversıteti fızıka, matematıka jáne aqparattyq tehnologııalar fakýltetiniń stýdentter komandasy da «Aqyldy úı» jobasyn jasady. Komanda jetekshisi Darhan Jaqsybaevtyń aıtýynsha, bolashaqta júzege assa, «Aqyldy úı» jobasynyń kóptegen qyzmeti bar. Úıge kirý úshin úı ıesiniń saýsaq tańbalary kerek. Baspanaǵa kirerde qozǵalys datchıgi iske qosylyp, jaryq avtomatty túrde janady. Jaryqtandyrý deńgeıin retteý júıesi de avtomatty túrde qosylady. Sonymen birge aýa raıy ózgeristerin baqylaý, perdelerdi ashyp-jabý júıeleriniń avtomatty jumysy, túngi ýaqytta baspaldaq arqyly qaýipsiz qozǵalý úshin arnaıy jaryq qosylmaqshy.
Stýdentter demekshi, byltyr «Ortalyq-Azııa otyn-energetıkalyq kompanııasy» AQ «Pavlodarenergo» AQ enshiles kompanııasynyń qoldaýymen oblys ákimdigi arasyndaǵy áleýmettik jobalardy birigip atqarý memorandýmyn júzege asyrý sheńberinde oblys ortalyǵyndaǵy polıtehnıkalyq montajdaý kolledjine 200 oryndyq jataqhana da salyp berdi. Bolashaq energetıkterge kásiporynǵa jumysqa barý úshin bul úlken senimdi demeý.
Jalpy, óńirde oblys ortalyǵynda, Aqsý men Ekibastuzda «Aqyldy úı» mobıldi qosymshasy tanystyrylýda. Bul jobalar qala turǵyndary men páter ıeleri kooperatıvterin turǵyn úıdiń jaǵdaıy týraly habardar etýge baǵyttalǵan. Qyzmet kórsetetin mekemeler bolsa ózderine qarasty úılerdiń kartasyn kórip baqylaı alady. Jobanyń avtory – «BF Group» JShS dırektory Sergeı Golyshev.
Oblys ortalyǵyndaǵy osyndaı «Aqyldy úıler» jobasynyń birin jasaýdy qolǵa alǵan «Pavlodarenergo» AQ kompanııasy turǵyn úıdiń qurylysyna 1,5 mlrd teńge bólse, 200 mıllıon teńgesine jer asty parkıngke qajetti qurylǵylar alǵan. Páterdiń bir sharshy metri 167 myń teńge shamasynda. Al kásiporynnyń jumysshy, qyzmetkerlerine 25 paıyzdyq jeńildik berilmek. «Aqyldy úıdiń» aýdany 52,4 jáne 63,9 sharshy metrdi quraıtyn 96 páterden turady.
Páter alatyn kompanııa jumysshy, qyzmetkeriniń jasy 45-ten aspaýy kerek. Kásiporynda on jyl eńbek etip, osy ýaqyt aralyǵynda páterdi satpaýy kerek degen sharttary da bar. Qazirdiń ózinde «Aqyldy úıden» páter alýǵa asyqqan 400-den astam ótinish túsken kórinedi.
Farıda BYQAI,
«Egemen Qazaqstan»
PAVLODAR
