Munyń ózi qarapaıym turǵyndar men ánsheıinde qol jetpesteı bolyp kórinetin joǵary memlekettik organdardyń arasyn jaqyndata túsedi. Tipti tikeleı baılanystyrady. QR Bas prokýratýrasynyń bastamasy boıynsha tusaýy kesilgen qanatqaqty joba respýblıka oblystary arasynda tuńǵysh ret Aqtóbe oblysynda iske qosylǵan. Bul úshin ózge emes, naqty osy óńir nelikten tańdalǵan?
QR Bas prokýratýrasynyń quqyqtyq statıstıka jáne arnaıy esepke alý jónindegi Komıteti tóraǵasynyń orynbasary Baqyt Ábishevtiń aıtýynsha Aqtóbede «Sıfrlyq Qazaqstan» baǵdarlamasy brıynsha júrgizilip jatqan jumystardyń deńgeıi joǵary. Bul óz kezeginde «Elektrondy ótinishter» jobasyn júzege asyrýǵa basty negiz qalaıdy. Oblys ortalyǵyndaǵy halyqtyq keńse qyzmeti de ony júrgizýge eleýli septigin tıgizbek. Sondyqtan da respýblıka úkimeti qanatqaqty jobany Aqtóbeden bastaý jóninde sheshim alypty.
Azamattardyń memlekettik organdarǵa jazǵan ótinishteri qoǵamnyń tamyr soǵysyn anyqtaıtyn barometr ispettes. О́ıtkeni turǵyndar memleketti basqarýǵa osyndaı elektrondyq túrdegi ótinishteri men usynystary arqyly qatysa alady. Atalǵan jobany odan ári jetildirýdiń qajettiligi de osynda. Taǵy bir túıindi másele: azamattar alǵashqyda óz ótinishterin qaı organnyń atyna joldaýyn dál bilmeýi de múmkin.Prezıdent ákimshiligine me, joq álde Úkimet pen salalyq mınıstrlikterge me? Nemese «Nur Otan» partııasy atyna ma? Sondyqtan da olardyń elektrondy ótinishteri osy máselelermen naqty túrde aınalysatyn organdarǵa kelip túsýi ońtaıly dep tanyldy. Joba halyqtyq keńse, mobıldi qosymsha, «Kazposhta» bólimsheleri jáne halyqqa qyzmet kórsetý ortalyqtary arqyly júrgiziledi. Qanatqaqty jobanyń prototıpin QR Bas prokýratýrasy men «Zerde holdıngi» ulttyq kompanııasy birlesip ázirledi deıdi bas prokýratýra ókili. О́z bastaýyn Aqtóbeden alǵan jarqyn joba tamyz aıynda elimizdegi úshinshi megopolıs Shymkentte, qyrkúıekte jańa oblys ortalyǵy Túrkistanda, qazan aıynda astana qalasynda engizilmek. Al 2020 jyly «Elektrondy ótinishter» júıesi tutastaı el aýmaǵyn qamtymaq. Mundaı jaǵdaıda berilgen ótinishterge jyldam jaýap alý tutqalary engizilgeni eýropalyq jáne álemdik standarttarǵa tolyqtaı sáıkes keledi. Sebebi «Elektrondy ótinishter» jaǵdaıynda keńselik syrǵytpa jaýaptar bolmaıtyny aıtpasa da túsinikti. Ekinshi jaǵdaıda jańa júıe qaı sala boıynsha turǵyndardyń ótinishteri kóbirek kelýine oraı tıisti saraptamalar jasaýǵa septigin tıgizbek.
Dál qazirgi kúni Aqtóbede qanatqaqty joba óz qyzmetin «Halyqtyq keńseniń» kómegi arqyly bastap otyr. Mundaǵy jumys isteý qaǵıdattary qandaı degenge kelsek, bul jerde ótinishterdi qabyldaýdyń basty qosyny jumys isteıdi. Dál osy jerde Aqtóbe qalasy ákimdiginiń jaýapty qyzmetkerleri azamattardyń ótinishterin qabyldaý men ony tıisti joǵary memlekettik organdarǵa jiberýdiń joldary men tártipterin túsindiredi. Bul árıne alǵashqy qadamdar ekeni belgili. Keıin turǵyndar bul istiń búge-shegesine qanyqqannan keıin «Áleýmettik ótinishterdi»derbes ózderi joldaı bermek.
Temir Qusaıyn,
«Egemen Qazaqstan»
AQTО́BE
