Jaqynda sol kezeńde oqý bitirgenderine 40 jyl bolǵan jýrnalıstıka fakýltetiniń stýdentteri kezdesti. Bul kezdesýge shaqyrylǵan áriptesimiz, tarazdyq aqyn Baıtanǵalı Tólentaev jastyq shaǵyn eske alyp, bylaı deıdi: «Meniń esimde qalǵan bir oqıǵa, halqymyzdyń aıaýly uly, zııaly qaýymnyń zerdeli zeıin ıesi, M.Áýezov atyndaǵy akademııalyq drama teatrynyń ǵajaıyp rejısseri, professor Asqar Toqpanov aǵamen qyzyqty kezdesý ótken bolatyn. Teatrdyń talantty tarlanymen uıymdastyrylǵan bul kezdesýge fakýltettiń stýdentterimen qatar oqytýshylary, jastar qatysty.
Asqar Toqpanov naǵyz óner sańlaǵy eken. Kezdesý keshinde teatr óneriniń mánimen shyǵý tarıhynan bastap, ózi eńbek etip júrgen ujymnyń izdenisteri, qol jetken tabystary, ult rýhyn kóterýdegi atqaratyn qyzmeti jaıly tebirene sóz sóıledi. Arıstotel teatr jaıly jan-jaqty eńbek jazypty. Uly Gete «Ult bolyp qalyptasý úshin ol halyqtyń teatry bolýy kerek», dep qalaı ádemi aıtqan. Uly rejısser stýdentterdi teatrǵa kelip turýǵa shaqyrdy. Asqar aǵanyń naǵyz kıeli óner ıesi ekenin baıqatqan taǵy bir jaı bar edi.
Ol kisi qustarsha saırap, túrli qustardyń únderin dál keltiretinin baıqatty, deıdi Baıtanǵalı. Qarlyǵashtyń, torǵaıdyń, qyrǵıdyń, tipti kóp adam kóre bermeıtin baıǵyzdyń únderin estigen kezimizdi shyǵys shaharyndaǵy ásem bir baqtyń ishinde júrgendeı sezingen edik.
Qyzyǵy, osy kezdesýde men sóıledim. Kýratorymyz Turymtaı Dúısebaeva apaıymyz meniń sóıleýimdi maqul kórgen edi, deıdi aqyn.
– Asqar aǵa, naǵyz óner ıesi ekensiz, osynaý óner jolynda jańa bıikterge samǵaı berińiz, – dep qurmetti qonaqqa Qazaq ýnıversıtetine 40 jyl tolýyna baılanysty jaryq kórgen úlken kitapty (1974 jyly jaryq kórgen) syıladym. Asqar Toqpanov aǵa óte rıza bolyp, fakýltet basshylyǵyna óz alǵysyn jetkizdi. «Bilimdi bol, órkeniń óssin», dep maǵan da jyly sózderin aıtty. Sol joly bolashaq fototilshi Rahymbaı Hanaly dos bizdi sýretke túsirgen. Eki-úsh kúnnen keıin eki sýretti shyǵaryp ákelip berdi. Bireýin Asqar aǵamyzǵa berýim kerek edi... «Sol eki sýret mende áli de saqtaýly, deıdi Baıtanǵalı Tólentaev. – Endi el gazeti «Egemen Qazaqstanǵa» usynamyn».
Saparbaı PARMANQUL,
«Egemen Qazaqstan»
ALMATY
