Sýretterdi túsirgen avtor
Ertis jaǵalaýynda Abaı atyndaǵy kitaphana men Ortalyqtandyrylǵan kitaphana júıesi birigip, «Kıeli dombyra úni» atty kórme uıymdastyrdy. Kúıshiler arasynda «Dombyra-party» saıysy uıymdastyryldy. Sondaı-aq, qaladaǵy Á. Qashaýbaev atyndaǵy fılarmonııa, Abaı teatry men Darıǵa-aı jastar teatrynyń ujymdary, M. Tólebaev atyndaǵy mýzykalyq kolledj stýdentteri birigip, kúı shertti.
- Elbasy Joldaýynda Ulttyq dombyra kúnin belgileý týraly aıtylǵan bolatyn,-dedi qala ákimi Ermak Sálimov,-mine, Semeıde qaınaǵan tirlik, el osynaý merekede erekshe qýanyp, toılap jatyr. Naǵyz qazaq qazaq emes, naǵyz qazaq dombyra dep aqyndar jyrlaǵandaı bul dombyranyń úninde elimiz ańsaǵan bostandyq, qazirgi beıbit tirlik, barlyǵy úndesip jatyr. Merekelerińiz qutty bolsyn! - dedi qala ákimi.
Budan keıin qala ákimi Ermak Sálimov qaladaǵy №1 perzenthanada bolyp, osynaý mereıli kúni bosanyp, ómirge ul ákelgen Gúljanat Nurtazınaǵa dombyra syıǵa tartty. Meıirbıkelerdiń aıtýyna qaraǵanda ul balanyń salmaǵy 3600, boıy 54 sm. Anasynyń da, sábıiniń de qal-jaǵdaılary jaqsy.Qala ákiminiń ózi quttyqtaǵanyna Gúljanat Nurtazına qatty rıza boldy.«Qazaq tili» halyqaralyq qoǵamynyń Soltústik-Shyǵys óńiri boıynsha vıse-prezıdenti Oral Sháripbaev: «Uly dalanyń ulyq merekesinde týǵan ul balamyzdyń baǵy ozsyn!» dep bata berdi.
Dál osyndaı shara qalanyń taǵy perzenthanasynda da boldy. Qalalyq Dostyq úıiniń dırektory Berik Kópbaev jańadan dúnıe esigin ashqan taǵy bir ulǵa dombyra tartý etti. 22 jastaǵy Erkejan Gıreevanyń uly úkili dombyraǵa ıe boldy. Qalalyq Dostyq úıindegi analar keńesiniń tóraıymy Naǵıma Moıynbaeva jas sábıdiń anasyna aq oramal syıǵa tartty. Úsh saǵat qana buryn bosanǵan ana osylaısha Ulttyq dombyra kúninde qýanyshqa keneldi. Bólmesi gúlge tolyp, tórinde dombyra turdy. Qushaǵyna sábıin qysqan Erkejan erekshe rıza boldy.
Raýshan NUǴMANBEKOVA,
Semeı.
