Qazaqstan halqy Assambleıasynyń XXVI sessııasynda Elbasy Nursultan Nazarbaev: «Assambleıanyń «Jańǵyrý joly» atty jańa jastar qozǵalysy jastardy jańǵyrý aıasynda biriktirýi kerek. Kúsh-jigerimizdi jastardyń ózekti startaptaryn qoldaýǵa baǵyttaý qajet», degen bolatyn. Osy tapsyrmany oryndaýdy kózdegen forýmda elimizdiń ár óńirinen kelgen jastardyń 50-ge tarta startap jobasy tanystyryldy. Oǵan QHA jáne oǵan qarasty «Jańǵyrý joly» qozǵalysynyń jas múshelerinen quralǵan 200-ge jýyq delegat qatysty.
Forýmnyń «Tabysty jobalar sherýi» alańynda qazirgi ýaqytta jobalarymen jumys istep jatqan «Baıserke-Agro» agroholdıngi quryltaıshysynyń keńesshisi K.Pavlov zamanaýı aýyl sharýashylyǵynda organıkalyq ónimder óndirýge qoldanylyp otyrǵan ınnovasııalyq tehnologııalaryn tanystyrsa, jobany ázirleýshi D.Korepanov «Aýyl – memleket tiregi» taqyrybyndaǵy tanystyrylymyn ótkizdi. «Jańa sheshim» bilim qorynyń bas dırektory V.Kım balalarǵa til úıretýdiń jańa ádistemelerimen bólisse, «Qazaqstannyń 100 jańa esimi» jobasynyń jeńimpazy M.Bekturǵanov bıonıkalyq protezderdiń jasalý tarıhy, tabysqa jetý jolyndaǵy qıyndyqtary men jetistikteri jaıly áńgimeledi. «Business camp» alańynda «Qazaqstannyń 100 jańa esimi» jobasynyń jeńimpazy, kásipker-mesenat Islambek Saljanov bıznestiń áleýmettik jaýapkershiligi taqyrybynda sheberlik synybyn ótkizse, «Jańa ıdeıalar sınergııasy» alańynda startap jobalardyń kórmesi ótti. Qatysýshylar joba avtorlaryna suraqtar qoıyp, taqyrypty keńinen talqylady.
«Sınergııa forýmy Elbasynyń bastamasyna sáıkes jastardyń tyń ıdeıasy men startaptaryn qoldaý maqsatynda uıymdastyrylýda. Búgin úzdik dep tanylǵan startap jobalardyń avtorlary óz ıdeıalaryn iske asyrýǵa múmkindik alady. Sol arqyly «Rýhanı jańǵyrý» baǵdarlamasynyń júzege asýyna atsalysamyz», dedi QHA Tóraǵasynyń orynbasary – hatshylyq meńgerýshisi Leonıd Prokopenko.
«Jańǵyrý joly» respýblıkalyq jastar qozǵalysynyń tóraǵasy Maksım Spotkaıdyń aıtýynsha, bul forým ótken aıda Almaty qalasynda bastalǵan eken. «Onda tórt jobaǵa úsh mıllıon teńge bólingen bolatyn. Búgin biz IT, qolóner, «jasyl» energııa, bilim alý jáne t.b. baǵyttaǵy 50-ge tarta jobany tanystyryp, 6 atalym boıynsha marapattap otyrmyz», dedi M.Spotkaı.
Atap aıtqanda, «Bıznes jáne rýhanı qoǵam» nomınasııasy boıynsha «Arman – bolashaqtyń mektebi» jobasy Baýyrjan Salyqov marapattalsa, «Maria system Ide» jobasyn jasaǵan Tımýr Rysbekov «Bolashaqqa baǵdar» nomınasııasyn jeńip aldy. «Green Startap» nomınasııasy «SQO-daǵy dárilik ósimdikter jıyntyǵy jáne Qazaqstannyń farmasevtıkalyq kompanııalary úshin shıkizat túrinde daıyndaý» atty jobany ázirlegen Aınur Ábiltaevaǵa buıyrsa, Dıana Aralbaeva «Gofrokarton» jobasymen «Eń kreatıvti ıdeıa» nomınasııasyna ıe boldy. Sondaı-aq «Etno qurylymdaýshy» jobasynyń avtory Aıdar Beksultanov «Týǵan jer» nomınasııasyn enshilese, «Úkili úmit» nomınasııasy «Bizben birge oqımyz» jobasyn jasaǵan Aıbek Idaıatov pen Samal Muhtarovaǵa buıyrdy. Startap jeńimpazdary men qatysýshylary dıplomdarmen, baǵaly syılyqtarmen marapattaldy.
«Startap jobalar boıynsha jastardyń arasynda óte jańa, óte qyzyqty ıdeıalardy kórip otyrǵanyma óte qýanyshtymyn. Usynylǵan barlyq jobalar qajetti qoldaýlarǵa ıe bolyp jatyr. Muny kórgen ózge jastardyń da talpynary sózsiz. Bizdiń Sarapshylar keńesi qoǵam qaıratkerleri men kásipkerlerden quralǵandyqtan búgingi jeńis óz qaharmandaryn tapty dep senemin», dedi QHA Astana qalasy Túrki etno-mádenı ortalyǵynyń tóraǵasy Ásker Pırıev.
Forým sońynda estrada juldyzdarynyń qatysýymen merekelik konsert qoıyldy. Sondaı-aq qonaqtar «Nur Álem» Bolashaq mýzeıin, Qarýly Kúshter Ulttyq áskerı-patrıottyq ortalyǵyn, «Astana Opera» teatryn tamashalap, «Allanyń gúli» atty jańa meshitte boldy.
Maıgúl SULTAN,
«Egemen Qazaqstan»
