Baızaq aýdanynyń ortalyǵy Sarykemer aýylynda ornalasqan «Erik ata» balabaqshasynyń qurylysyna 11 mıllıon teńge jumsalypty. Mereke qarsańynda paıdalanýǵa berilgen bóbekjaıdyń ashylý saltanatyna baızaqtyq turǵyndar kóptep qatysyp, elimizdiń búgingi damý deńgeıine, Jambyl óńiriniń kún sanap gúldenip kele jatqanyna rızashylyq bildirdi. Jospar boıynsha mundaǵy 3 topta 75 bala mektepke deıingi tárbıemen qamtylady. Al balalardy 6 pedagog qazaq tilinde oqytady.
Sonymen qatar Jambyl aýdanynyń Aqbulym aýylynda boı kóterip, halyq ıgiligine berilgen «Zerde» balabaqshasyndaǵy 2 topta 50 bala oqıdy. Atalǵan baldyrǵandarǵa arnalǵan nysanda jumyspen qamtylǵan 6 muǵalim balalarǵa qazaq tilinde bilim beredi. Taraz qalasynyń irgesinde ornalasqan aýyldaǵy balabaqsha zaman talabyna saı jabdyqtalǵan.
Oblys ortalyǵynan alpys shaqyrymdaı jerde ornalasqan Jýaly aýdanynda bul kúnde «Burnoe Solar-1» kún elektr stansasy jumys isteıdi. Astana qalasynyń mereıtoıyna oraı «Burnoe Solar-2» jaýapkershiligi shekteýli seriktestigi ashyldy. Atalǵan nysannyń ekinshi kezeńgi kesheniniń qurylysyna 22 mıllıard 667 mıllıon teńge jumsalǵan. Onyń 7 mıl-
lıard 804 mıllıon teńgesi United Green-Samruk Kazyna jaýapkershiligi shekteýli seriktestiginiń menshikti qarjysy bolsa, qalǵan 17 mıllıard 580 mıllıon teńge Eýropa qaıta qurý jáne damý banki men Taza tehnologııalar qorynan alynǵan. Qýattylyǵy 50 MVt-ny quraıtyn balamaly qýat kózin óndirý nysanyn salý jumystaryna 300 adam tartylsa, nysan iske qosylǵan soń munda 45 adam jumyspen qamtylady.
Jalpy, elorda toıy – eldiktiń toıy bolǵan soń, Jambyl óńirinde turatyn árbir azamat baıtaq shahardyń qýanyshty kúnine arnalǵan aksııadan qalys qalǵan joq. Olaı deıtinimiz, óńirdiń barlyq aýdandarynda jańa nysandar el ıgiligine berilip, halyq qýanyshyn eseledi. Merki aýdanynda 125 óskindi mektepke deıingi tárbıemen qamtıtyn «Ersultan» balabaqshasy ashyldy. Bul kúni merkilikter kópten kútken qýanyshty sátterge kýá boldy. Atalǵan mekemede 4 top jumys istep, balaqaılar 3 tilde bilim alatyn bolady. Qazirgi tańda balabaqshaǵa 104 bala jınalǵan.
Elorda mereıtoıy qarsańynda Qordaı aýdanynyń turǵyndary da kóptegen ıgilikke keneldi. Qasyq aýyldyq okrýginiń ózinde 7 birdeı nysan iske qosyldy. Atap aıtsaq, Áljan ana aýylynyń tarıhı mýzeıi paıdalanýǵa berildi. Munda aýyl tarıhyna qatysty barlyq derekter jınastyrylǵan. Sondaı-aq atalǵan aýyldaǵy mýzeı jádigerleriniń bir parasy Áljan ana men onyń týystaryna arnalǵan. Al Elbasy Nursultan Nazarbaevtyń Qordaı aýdanyna jumys sapary barysynda túsirilgen estelik sýretter mádenı nysannyń tarıhı mazmunyn arttyryp tur. Aıta keteıik, oblys ákimi Asqar Myrzahmetovtiń tapsyrmasyna sáıkes, bar bolǵany 1,5 aıda boı kótergen mýzeı zamanaýı sıfrly tehnologııamen jabdyqtalǵan.
Sonymen qatar Áljan ana aýylynda dárigerlik ambýlatorııa aýyl turǵyndaryna esigin aıqara ashyp, el azamattarynyń qýanyshyn kóbeıtti. Atalǵan nysan 15 kelýshige arnalǵan. Qurylysyna 35 mıllıon teńge jumsalǵan dárigerlik ambýlatorııada 9 medısına qyzmetkeri jumys isteıdi. Aýyl turǵyndarynyń densaýlyǵyn saqtaý baǵytymen qatar, bul jerde buqaralyq sportty damytýǵa da basa nazar aýdarylyp otyr. Osy oraıda Áljan ana aýylynda sport alańshasynyń paıdalanýǵa berilgenin atap ótken jón. Bul maqsatqa oblystyq bıýdjetten 8 mıllıon 756 myń teńge bólinip, nysannyń qurylysyn «Al-Arkarjan ı K» jaýapkershiligi shekteýli seriktestigi júrgizgen.
Kezinde óndirisimen áıgili bolǵan Sarysý aýdanynyń Jańatas qalasynda «Solıanaıa kompanııa «Asyl tuz» jaýapkershiligi shekteýli seriktestiginiń as tuzyn óndiretin zaýyty iske qosyldy. Astananyń 20 jyldyǵyna oraı ashylǵan jańa óndiris oshaǵynyń qurylysyna 710 mıllıon teńge qarastyrylǵan. Jylyna 50 myń tonna as tuzyn shyǵarýǵa qaýqarly kásiporynda jospar boıynsha 75 adam jumyspen qamtylmaq. Jumyskerlerdiń ortasha jalaqysy 60-80 myń teńge bolady. Jalpy, atalǵan joba Jambyl oblysy ákimdiginiń 2016 jyly 30 jeltoqsandaǵy №369 qaýlysy negizinde óńirlik kásipkerlikti qoldaý kartasyna engizilgen.
Elorda toıyna tartý negizinde Jambyl oblysynda júzege asqan júıeli jumystar T.Rysqulov aýdanynda da jalǵasyn tapty. Mereıtoı qarsańynda aýdan ortalyǵy Qulan aýylynda 160 adamǵa arnalǵan deneshynyqtyrý-saýyqtyrý kesheni ashyldy. Nysan qurylysyna 362,8 mıllıon teńge bólingen. Merdiger «Nur Tursyn» jaýapkershiligi shekteýli seriktestigi keshen qurylysyn ótken jyldyń naýryz aıynda bastap, eldiktiń merekesine oraı el turǵyndaryna tartý etti.
Al Talas aýdany, Qarataý qalasynda bıyl qonystoı kóbeıdi. Qarataýlyqtar Astana kúnin jańa páterde toılaıtyn boldy. Aýdan ortalyǵynda 70 páterli kóp qabatty turǵyn úı paıdalanýǵa berildi. Shaǵyn shahardyń 5-shaǵyn aýdanynda ornalasqan №51 úıdiń jóndeý jumystaryna 226 mıllıon 886 myń teńge bólingen. Sonymen qatar Qarataý qalasynda «Eldana» balabaqshasy paıdalanýǵa berildi. Atalǵan nysan 50 balaǵa arnalǵan. Jobalyq quny 20 mıllıon teńgeni quraıtyn mektepke deıingi bilim berý mekemesinde balalardyń zamanǵa saı bilim alýyna barlyq múmkindik jasalǵan.
Shý aýdanynyń ortalyǵy Tóle bı aýylynda «Nur-Ash» jáne «Lashyn» balabaqshalary óz jumysyn bastady. Jalpy quny 41,5 mıllıon
teńgege salynǵan «Nur-Ash» balabaqshasy 75 baldyrǵandy qabyldaýǵa arnalǵan. Munda óskinder qazaq jáne orys tilderinde bilim alady. Al «Lashyn» balabaqshasynyń qurylysyna 7 mıllıon teńge bólingen. Bul jerde de 75 baldyrǵan úsh topqa bólinip, oqytylady.
Taraz qalasynda oblystyq olımpıadalyq rezerv arnaıy mektebiniń 3 angarlyq sport zaly paıdalanýǵa berildi. Onyń qurylysyna 494,7 mıllıon teńge bólingen. О́tken jyldyń naýryz aıynda bastalǵan nysannyń qurylys jumystaryn «Qarataý qurylys-2030» jaýapkershiligi shekteýli seriktestigi júrgizgen. Nysan jobasyn «Taraz-Tehnoproekt» kompanııasy jasaǵan. Al qurylysy ótken jyly bastalǵan oblystyq arnaıy balalar-jasóspirimder №4 sport mektebindegi velosıped bazasynyń qurylysyn «AEM» jaýapkershiligi shekteýli seriktestigi júrgizgen. Mereke qarsańynda máresine jetken jumystarǵa 166,5 mıllıon teńge jumsalǵan.
Taraz qalasyndaǵy «Balasaǵun» ortalyq konsert zalynda «Astana – aımaqtardyń arqaýy» atty oblystyq forým ótti. Atalǵan forýmda Jambyl oblysynyń ákimi Asqar Myrzahmetov sóz sóılep, barsha jambyldyqtardy Astana kúnimen quttyqtady.
Eń bastysy – qysqa ǵana 20 jyl ishinde Astana memlekettik brendke, máńgilik memlekettigimizdiń, asqaq rýhymyzdyń nyshanyna aınaldy! Astana el damýyndaǵy baǵyt-baǵdarǵa, qozǵaýshy kúshke serpin berip otyr. Sonyń ishinde óńirlerdiń damýyna da oń yqpal etip otyrǵandyǵy belgili. Sondyqtan da búgingi «Astana – aımaqtar arqaýy» atty forýmnyń ótýi oryndy. О́ıtkeni óńirlerdiń órkendeýi – Astananyń damýymen tamyrlas! Memleket basshysy «Astana 20 jyldyń ishinde búkil álem qyzyǵa kóz tikken megapolıske, álemniń mańyzdy kezdesýler ótetin únqatysý alańyna aınaldy. Qalamyz qarqyndy damyp, órkendeýdiń kelesi belesine qadam basty» degen bolatyn. Bul – álemdik kezdesýler alańyna aınalǵan Astana týraly qysqasha qaıyrylǵan baǵa.
Sonymen qatar «Astana – aımaqtardyń arqaýy» atty oblystyq forýmda Qazaqstannyń eńbek sińirgen qaıratkeri, aqyn Qaıyrbek Asanov, Taraz memlekettik pedagogıkalyq ýnıversıtetiniń kafedra meńgerýshisi, pedagogıka ǵylymdarynyń doktory Tursynaı Ábdiqadyrova, Taraz qalasyndaǵy №40 mektep-gımnazııa dırektorynyń orynbasary Irına Shedrına jáne elordanyń qurdasy, Súleımen Demırel atyndaǵy ýnıversıtettiń 4-kýrs stýdenti Erkejan Ybyraeva syndy azamattar sóz sóılep, búgingi tańdaǵy Astana qalasynyń damý qarqynyna, elimizdiń álem aldyndaǵy bedeline toqtaldy. О́z sózderinde spıkerler Astana ár qazaqtyń maqtanyshy ekenin, sonymen qatar búgingi jetistigimiz tatýlyq pen beıbitshiliktiń nátıjesinde kelip otyrǵanyn jetkizdi.
Atalǵan forýmnyń sońynda oblystyq fılarmonııa ánshileri «Elimniń júregi – Astana», «Gorod moı», «Arman qala – Astana», «Elin súıgen Elbasy», «Nurly Astana», «Aıaýly Astana» ánderin naqyshyna keltire oryndap, kórermen kóńilin serpiltti.
Hamıt ESAMAN,
«Egemen Qazaqstan»
Jambyl oblysy
