Ilgeride Jambyl oblysynyń jáne Taraz qalasynyń Qurmetti azamattarynyń, Olımpıada, álem jáne Azııa chempıonattary jeńimpazdarynyń esimderi kóne shahar ortalyǵyndaǵy Qaırat Rysqulbekov atyndaǵy saıabaq aldynda ornalasqan «Eńbek dańqy» alleıasyndaǵy «Qurmet taqtasyna» engizilgen bolatyn. Tasqa qashalyp jazylǵan tarıhı esimder árdaıym eldiń erge degen qurmetin arttyryp keledi.
Búgingi tańda atalǵan «Qurmet taqtasy» oblystyq tarıhı-ólketaný mýzeıine aýystyrylǵan edi. Osy oraıda Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasynyń negizinde oblystyq mádenıet, arhıvter jáne qujattama basqarmasynyń qoldaýymen mýzeıge qoıylǵan «Qurmet taqtasynyń» tanystyrylymy ótti. Shara barysynda basqarma basshysynyń orynbasary Sara Mádıeva taqtanyń janyna sensorly dúńgirshek ornatylyp, oǵan Qurmetti azamattar men chempıondar týraly barlyq málimetter engiziletinin aıtty. Endi tizimdegi azamattar jaıynda arnaıy beınerolıkter daıyndalyp, álgi derekqorǵa engiziletin bolady. Mýzeıge kelýshiler budan bylaı óńirdiń Qurmetti azamattary men sport jeńimpazdary týraly barlyq aqparatty osynda ornatylǵan shaǵyn ǵana dúńgirshekten taba alady.
Jalpy, «Jambyl oblysynyń Qurmetti azamaty» ataǵy tuńǵysh ret birinshi shaqyrylǵan oblystyq máslıhattyń 1999 jylǵy 17 qyrkúıektegi HHIII sessııasynyń sheshimimen dańqty qyzylshashy, Sosıalıstik Eńbek Eri Darıǵa Jantoqovaǵa berilgen eken. Al Taraz qalasynyń tuńǵysh Qurmetti azamaty – Elbasy Nursultan Nazarbaev. Prezıdentke qurmetti ataq Taraz qalalyq máslıhatynyń 1997 jylǵy 8 qańtar kúngi kezekten tys sessııasynda berilipti.
Jıyn barysynda oblystyq ardagerler keńesiniń tóraǵasy, Taraz qalasynyń Qurmetti azamaty Sansyzbaı Jorabekov, erkin kúresten London Olımpıadasynyń jáne álem chempıonatynyń qola júldegeri Aqjúrek Tańatarov sóz alyp, bul bastamaǵa rızashylyq bildirdi. Oblystyq tarıhı-ólketaný mýzeıiniń dırektory Gúlnur Emberdıevanyń aıtýynsha, Taraz qalasynyń Qurmetti azamaty ataǵyn 139 azamat alǵan eken. Al 60 azamat ár jyldary Olımpıada, álem jáne Azııa chempıonattarynyń jeńimpazy atanǵan. «Qurmet taqtasy» óziniń laıyqty ornyn tapty dep oılaımyz. Endi óńir turǵyndarymen qatar, ár aımaqtan jáne shetelden kelgen qonaqtar osy buryshtan Qurmetti azamattarymyzdy tanyp, ózderine kerekti barlyq málimetti ala alady», deıdi mýzeı basshysy.
Hamıt Esaman,
«Egemen Qazaqstan»
Jambyl oblysy
